Hüt het üs dank eu en bsundrige tag erwartet und mir hend öppis eimoligs dörfe erlebe. Damit mir jo rechtziitig parat gstande sind, hemmer zur sicherheit nöd nur ein sondern grad zwei wecker gstellt. De treffpunkt isch nämli scho am 4:30h xi.
Müed aber voller vorfreud hemmer do uf üsen shuttlebus-chauffeur gwartet. De het üs denn zum startplatz gfahre. Parkiert hetter voreme fels – hemmer gmeint, ide dämmerig. Debi ischs scho de halb ufblosni heissluftballon xi.
S immer wieder ufflackere vo de flamme usem gasbrenner, wo churzziitig alles taghell schiine loh het, die heissi luft wo eim entgegeströmt isch und de immer grösser werdendi ballon, hend eim erahne loh, dass es bald los go wird. Mit öppe 20 anderne fluggäst und 2 pilote hemmer denn in chorb dörfe chlettere. Churz druf abe simmer au scho abghobe, begleitet vom grüsch vom stetig zündende gasbrenner. Schnell gwünned mir a höchi und schwebed ide früehne morgestunde über die iidrücklichi Landschaft vo Kappadokien. Automatisch chunnt eim do s lied vo de Nena in sinn – es sind zwor nöd nur 99 sondern 150 luftballön.
Churz nochem 6:00h seit de pilot „it’s sunnrising“, zieht a zwei schnür, so dass sich de ballon elegant dreiht und mir e wunderbari sicht uf die erste sunnestrahle hend, wo sich am horizont zeiged.
Kappadokien ghört siit 1985 zum unesco-weltnaturerbe. Die einzigartig vulkanlandschaft mit de bizarr gformte felsformatione mached de reiz vo dere region us.
De landeplatz isch nöd bekannt im vorrus, so dass mer eifach de moment gnüsst und sich überrasche loht, wos eim anetriibt. Eso isches au echli mit üsere reis; der weg ist das ziil.
Danke eu nomol viilmol, dass ihr üs das erlebnisriich highlight ermöglicht hend!
Liäbi grüess
Manuel & Ilona
