Nochem Pangong Lake🏞 ischs wiiter. Zerst hemmer vorgha, eifach am ufer entlang in richtig china🇨🇳 fahre sowiits möglich isch. Denn hemmer drüü mega fründlichi und interessanti Indonesier🇮🇩 troffe, wo ufem weg zum Tsomoriri (au en see) xi sind und üs empfohle hend, ebefalls döt ane z fahre. Es isch e wunderschöni strecki xi, wieder überen 5000 meter hoche pass. Mir sind fast keim andere fahrzüg begegnet. Defür hend üs e herde wildesel🐎 und es paar murmeltierli begrüesst. Ansonste; friedlichi stilli und wiit weg vo allem. De Tsomoriri🏞 isch ebefalls en sehr schöne bergsee. Üs hets jedoch am Pangong Lake besser gfalle, wiil mir direkt am wasser hend chönne parkiere, wa bim Tsomoriri nöd gliich schön möglich xi isch.😉
Zrugg in Leh hemmer nocheme bewachte parkplatz fürs Tatütata🚒 gsuecht und üs denn zum trekke🥾 ufgmacht. Mir hend de trek im Markha valley gmacht und sind drüü täg unterwegs xi. Es schöns tal, wo mer hauptsächlich am fluss entlang ufwärts wanderet. Die ersti etappe isch mehrheitlich e breiti schotterpiste, aber spöter wirds zume schöne wanderpfad. Mir hend üses eigne zelt⛺️, d schloofsäck und de proviant mitgschleppt und so am flussufer campiert. Eigentlich lässig, jedoch simmer nochli unerfahrni zelter und müend üsi usrüstig nochli ergänze.😇 Vor de pass überquerig hemmer ufem high camp, im zelt⛺️ uf 4800 meter gschloofe. Über nacht hets sogar chli gschneit❄️ und es isch chälter worde als erwartet. Am nögste morge simmer drum zügig los, dass mir durd bewegig warm übercho hend. De letschti kilometer isch happig xi bis ufe. Leider ischs ufem pass ziimli bewölkt☁️ und windig🌬 xi, so dass mir üs sehr glii scho wieder an abstieg gmacht hend.
Mitem Tatütata🚒 ischs denn wiiter is nögste Tal, is Suru valley. Gern wäred mir em tal gfolgt bis uf Zanskar. D strosse🛣 sind jedoch wieder so bumpig, dass mir üs degege entschiede hend. Wenn möglich möchted mir s Tatütata🚒 chli schone, es het vorher scho einiges mösse mitmache.
Ide nöchi vo Kargil hemmer en ideale stellplatz gfunde – wieder mir flüssend, klarem wasser💧 vor de türe und eme natürliche becki, wo sich de bach zume pool staut. Wiils rundume berge⛰️ het, hemmer am morge lang schatte und es isch ziimli frisch, dass mir sogar wullesocke🧦 ahend. Wenn d sunne☀️ do isch, wirds so schön warm, dass mir ide badhose🩳👙 en schwumm nehmed i üsem badeteich. Am tag duure hets vereinzelt iiheimischi, wo verbi chömed go sich wäsche🧼, wösch wäsche🧺 und s auto putze – und mir macheds genau so😅. Spaziergäng am fluss entlang, ide felse umechlettere🧗🏾♂️ oder eifach chli lese📖, es isch grad so schön entspannt do.
Fun fact: D ilona cha wenn sie müed isch eigentli überall schloofe😴 – het sie gmeint. Bim zelte⛺️ het sich da denn aber als falsch usegstellt. Die einzig isomatte wo mir hend, het de manuel dörfe. D ilona het direkt ufem bare, unebne und eher harte untergrund gschloofe (oder ebe nöd gschloofe). Do isch au sie a ihri grenze cho😉
Ide vergangne wuche hemmer grad zwei bizzarri erlebnis und zweimol glück🍀 gha. S erste ereignis het sich ufeme chlosterparkplatz🛕 abgspielt. Es isch obig xi und mir hend üs do zum über nacht stoh, iigrichtet. Mir hend üs grad wölle ready mache für is bett🛏, wo mir vome komische grüüsch ufgschreckt sind. Wa isch da xi? Mir hends nöd chönne zueordne. De manuel isch hinder s Tatütata🚒 und d ilona het vor s Tatütata🚒 wölle go luege. Do chunnt plötzli es fahrerloses auto🚘 uf sie zuegstüüret, verfehlt knapp s Tatütata🚒, rollt wiiter überd muur🧱 – flüügt – buum – und landet ufem dach! Wie im film📽, aber halt real. Glücklicherwiis isch kein personeschade entstande.
De nögsti vorfall het sich nur wenigi täg spöter ereignet. Wieder simmer ufeme chlosterparkplatz🛕 fürd nacht parkiert gstande. Es isch bereits dunkel xi und mir sind im bett🛏 glege, churz vorem iischloofe. En chlapf und e starchi erschütterig hend üs grad wieder hellwach gmacht. Wa isch los?! De manuel isch sofort usegstürmt. Ezz isch doch tatsächlich eine mit sim auto🚗 hinderschi voll i üses heck gfahre! Am Tatütata🚒 hets zum glück nünnt gmacht, nöd emol en chratzer. De ander fahrt ezz ohni rückliechter ume…
Noch dene zwei filmriife📽 aktione hoffed mir, dass es das xi isch mit dere art vo abentüür.
Mittlerwiile hemmer beidi üses Pakistan🇵🇰 visum und werded wohrschiinli öppe inere wuche d grenze überquere.
Liäbi grüess manuel & ilona
