Vo Graz ischs über Wien, in richtig Linz und Salzburg🇦🇹. D adventsmärkt🎄 sind in vollem gange und mir hend üs bi winterliche❄️ temperature und verschneite🌨 täg ufd wiehnachtsziit🎄 iigstimmt.
D umgebig wird üs immer vertrauter. Sogar e herrlichi sicht ufd Alpe🏔 hemmer scho dörfe gnüsse.
Bi üsne östriichische🇦🇹 früünde, wo mir vor monate in Indie🇮🇳 und Nepal🇳🇵 kenne glernt hend, simmer jedoch in gedanke💭 grad wieder i ferne länder xi und zemme in erinnerige gschwelgt.
Bevor mir zrugg id Schwiiz🇨🇭 cho sind, hend mir no usgholt und sind im schwarzwald🌲 bide family👨👩👦👦 vom manuel verbi und sind herzlich begrüesst worde bime gmeinsame znachtesse🍝.
Am 14.12. isches denn sowiit xi. Mir sind am morge ufgregt und nervös losgfahre🚒. Es sind ezz no rund 150 kilometer bis hei – uf de platz, wo mir vor 1,5 johr losgfahre sind. D spannig stiegt, wo mir d grenze bi Konstanz🇩🇪 id Schwiiz🇨🇭 überquert hend. Es chunnt üs unwürklich vor, no 20 kilometer. Und denn plötzli sind mir z Romanshorn heil und xund aacho. Mit luutem gehupe📢 fahred mir uf de platz, wo es „♥️-lich Willkommen“ liintuech für üs ufgstellt worde isch. De zündschlüssel🔑 wird umedrüllt und d handbrems azoge – mir hends gschafft! Mir lueged üs aa mit träne💧 ide auge und gend üs en kuss. S mami vo de ilona chunnt uf üs zue und mir umarmed üs und träne💧 kullered üs allne überd bagge. Erliechterig und freud sind d gfühl, wo üs grad übermanned.
Am samstig druf, also numme grad zwei täg spöter, het s willkommens-festli🥳 stattgfunde. Im garte, am lagerfüür🔥 bi glüehwii, raclette🧀, gerstesuppe und waffle🧇 simmer wahnsinnig toll empfange worde vo üsne verwandte und bekannte. De duft vo waffle🧇 und kaffi ide luft het d stimmig versüesst und wiehnachtlichi lieder🎶 s ganze untermolet.
Last but not least:
Danke eu allne vielmol, wo am fest🥳 debi xi sind! Danke für alli liäbä wort und die schöne überraschige♥️! Es grosses danke möchted mir au a alli richte, wo üs uf üser reis🚒 uf irgend e art begleitet und unterstützt hend! Und danke dir, wo ezz grad de text glese het!
Mir wünsched eu allne frohi festtäg🌟 und numme s besti fürs johr 2024🍀!
Liäbi grüess manuel & ilona
