Nepal🇳🇵 isch bekannt für sini nationalpärk mit de tiger🐅, elefante🐘, panzernashörner🦏, affe🐒 und de berge🏔 mit schöne trekkingtoure.
Gstartet sind mir im Bardia Nationalpark und hend en ganztägige jungle-walk mit zwei lokale guides gmacht. Am morge früeh, d sunne☀️ isch erst grad ufgange, hend mir üs mit je eme bambusstock bewaffnet, is dichte grüen🌱 gmacht. Sölled mir üs miteme bambusstock gege en agriffende tiger🐅 chönne wehre⁉️ Ganz ufklärt simmer nöd worde über das stuck holz…😉 Sehr bald scho simmer uf diversisti spure gstosse; abdrück im sand vo tigerpfote🐾 und elefantefüess, kothüüfe💩, getrööte vo elefante🐘 und alarmgekreische vo affe🐒, wo druf higwiise hend, dass grad en tiger🐅 i de nöchi verbiigschliche isch. Zu gsicht becho hemmer nebst bunte vögel🦜, affe🐒 und hirsche🦌, zwei panzernashörner🦏. Die meist ziit hemmer jedoch muxmüsli still verbrocht, mit stundelangem warte und usschau nocheme tiger🐅 z halte; am flussufer oder ufeme hochsitz. Leider het sich jedoch keine zeiged, aber mir hend trotzdem en wunderschöne tag im jungle🌳🌴🌱 dörfe verbringe. Erst ide obigdämmerig, hend mir üs wieder id zivilisation🏘 begeh.
Do simmer au mol wieder uf anderi büsli-reisendi gstosse – es belgischs🇧🇪 pärli, mit dene mir üs guet verstande und so au zemme es paar täg verbrocht hend. Öb das en spiiliobig xi isch, fürenand choche🍽 oder eifach gmüetlichs zemmehöggle und über gott und die welt philosophiere – wa mer halt so mit fründe macht.😊
Ide nöchi vom Banke Nationalpark hend mir en eigentlich schöne stellplatz gfunde, wo mir e kajaktour🛶 gmacht hend und de jungle vom wasser us uf üs wirke loh hend. S einzige, wa es bizzeli es komischs gfühl geh het a dem stellplatz, isch, dass a dem flussufer🏞 e art friedhof xi isch und hinduistischi beerdigunge stattgfunde hend. Mir hend xeh, wies jewiils e riesigs füür🔥 gmacht hend, de liichnam drufgleit und verbrennt hend. Es sind bsundrigi ereignis xi und nöd eifach das i wort z fasse, wa mir xeh hend. Irgendwie befremdend und doch würdevoll.
Wiiter uf üsem weg simmer bi Lumbini verbi cho. Da isch de geburtsort vom Buddha, em begründer vom Buddhismus☸. Do gits e grossi parkaalag mit de verschiedenste buddhistische tempel🛕 us de ganze welt und ide mitti verlauft en wasserkanal, wo mer mitem böötli kutschiert wird – wa a Venedig erinneret. Mir jedoch hend üsi drothesel🚲 gsattlet und hend üsi rundi so dur de park⛲ dreiht.
En nögste nationalpark, isch de Chitwan Nationalpark – dä ältisti in Nepal🇳🇵 und glaubs au ein vo de touristischste. Platziert hemmer üs am rande vom nationalpark, usserhalb vome dörfli und wieder mol direkt ame fluss. Flüss und wasser💧 allgemein gits in Nepal🇳🇵 relativ viil. Es isch üs gseit worde, dass es noch Brasilie🇧🇷, das Land mit de grösste wasserressource isch.
Ide vergangne täg simmer öfters wieder für mehreri nächt am gliiche ort xi und sind langsamer greist – so nochem motto „weniger isch meh“. D ziit hemmer gnutzt zum bache🥧, neui rezept usprobiere, lese📚, mit dene viilne chind spiele🏸, wo do wohned oder au eifach de elefante🐘 zueluege, wies verbii spaziered und badet werded.
Real fact Nepal🇳🇵:
-Nepal wird als d „Decke der Welt“ bezeichnet, well do 8 vo de 10 höchste berge🏔 sind. De höchsti berg isch de Mount Everest, oder „Sagarmatha“ wie ihn d nepalese nenned, mit 8848m.
-Daal (linse) Bhat (riis🍚) isch s grundnahrigsmittel vom Himalaya.
-Grüesse tuet mer sich do mitem wort „Namaste“ und i dem mer gliichziitig beidi handfläche vor de brust zemmehebt🙏🏼.
Nochem jungle-erlebnis im süde vom land, wirds für üs denn ide nögste wuche richtig norde id berge🏔 goh – wege dem simmer jo ursprünglich cho🥾.
Liäbi grüess manuel & ilona
