So schnells de indischi verchehr zueloh het, so schnell hend mir üses ziil Ladakh erreicht.
Nebst de landschaft sind au d kulture do im indische Himalaya nomol ganz andersch als im restliche land. Mir sind i dörfli verbi gfahre, wo sehr muslimisch prägt sind und ezz i regione unterwegs, wo vorallem de tibetischi buddhismus vorherrscht.
Siit tage sind mir permanent vonere unglaubliche bergwelt umgeh. D felse sind kahl und fast ohni pflanze und doch wunderschön. Sie zeiged sich ide verschiedene grautön über beige bis zu rötlich-bruun und sind ade spitze mitere wiise schneedecki gschmückt.
Vo de stadt Leh us simmer über eini vo de höchste, befahrbare strosse über de Khardung La Pass mitere höchi vo 5480 meter über meer, is Nubra Valley cho. Zwüschet sanddüne, ame bächli mit klarem wasser hend mir en schöne stellplatz gfunde. Es bad i dem suubere wasser hend mir üs nöd entgoh loh und die herrlichi erfrischig gnosse. Am obig hend denn sogar no zwei kamel verbigügsled.
Turtuk isch s vorletschte örtli vor de pakistanische grenze und het es herzigs altstädtli am hügel, wo mir bsuecht hend. Zur ziit isch ide region grad d aprikose saison und mer xeht nebst de viilne bäum mit de riife, orange frücht, au überall d aprikose uf plachene ide sunne zum tröchne usgleit. Üses zmorgemüesli het somit en neue gschmack becho.
Über e route vo Diskit via Durbuk, wo etappewiis sehr offroadig xi isch, simmer an Pangong Lake glangt. Mit uf über 4000 meter über meer isch das de höchstglegni salzsee uf de welt. Zu eim drittel liit er uf indischem bode und zwei drittel ghöred Tibet/China. S panorama, wo sich do eim büüted isch traumhaft und wirkt wie gmolet. De see strahlt ide farbe vo dunkelblau bis helltürkis und im hintergrund wieder die wahnsinnig bergwelt. D sunne schiint de ganz tag und het ziimli chraft. Am ufer zue goth en frische luft, wa sehr agnehm isch.
Fun fact: Vo üsem idyllische stellplatz ide sanddüne hend mir jo scho verzellt. Es git do no e chliini ergänzig. Pünktlich zu sunneuntergang fahrt en bus mit luuter knapp erwachsne indische touriste nebed üs ane. Sie stelled ihri zelt uf und installiered e luuti musigbox, wie au en helle schiiwörfer. Fertig ischs xi mit de ruhige, friedliche stimmig. Üses glück isch jedoch xi, dass sehr glii scho en sandsturm ufzoge isch und d party somit nöd ewigs duuret het und au sie bald fiirobig gmacht hend.
Am Pangong Lake loht sichs guet nochli verwiile. Und aschlüssend stoth nomol en mehrtages trek ufem programm.
Liäbi grüess manuel & ilona