S kloster chor virap in Armenie 🇦🇲liit fast uf de türkische grenze und mer het bi günstige wetterverhältnis☀️ e wunderbari sicht uf de berg Ararat⛰.
Da kloster het fürd armenier e bsunderi bedütig; ufgrund vo de gschicht vom „Gregor“ hend d armenier nämli, vor langer ziit – als allerersts volk – s christetum als staatsreligion agnoh. De berg Ararat – uf dem d arche noah vor langer ziit gstrandet söll sii – liit zwor uf türkischem 🇹🇷bode, isch aber trotzdem es nationalsymbol vo Armenie.
Ufem weg in süde uf de einspurige „autobahn“ hemmer zwei täg bim shaki wasserfall verbrocht. Sehr schöni gegend und mega chalts wasser zum bade.
S kloster Tatev hemmer mit de weltwiit längste seilbahn🚡 erreicht. Über zwei bergkuppe und d Worotan-Schlucht simmer 5750m vom dörfli Halidsor zum Örtli Tatev gondelet. Es isch echli wolkig ⛅xi a dem tag, sodass d sicht leider es bizzeli iigschränkt xi isch. S kloster Tatev isch eis vo de bedütenste architekturdenkmöler vom land.
Wieder in richtig norde unterwegs het natürli en ufenthalt am Sewansee nöd dörfe fehle. Da isch de grössti süesswassersee vo Armenie 🇦🇲sowie em ganze Kaukasus und dopplet so gross wie de Bodesee. Es het sich fast chli aagfühlt wie am meer🌊.
Wies de zuefall so will, sind mir eimol meh unverhofft anes festival gfahre. Das het ufem COAF (children of armenia foundation) gländ stattgfunde. Nebst enere expo mit produkt us de region, food 🌮🌯🍔🥙ständ, vorträg über s universum hets au e bühni mit live musig 🥁🎸geh. Und mir sind mittedrin debi xi. Villicht no churz als ergänzig wa COAF isch: zemmegfasst chamer sege, dass da e entwickligshilfsorganisation im bereich vo bildig isch. De armenische chind wird do zuesätzlich und freiwillig unterricht👨🏫 i verschiedene fächer wie programmiere/informatik 🖥etc. geh. Spannendi sach!
D klöster Haghpat und Sanahin sind ebefalls vor langer ziit erbaut worde und hemmer a üsem letschte tag in Armenie besichtigt. Sie beidi ghöred zum UNESCO weltkulturerbe und sind sehr sehenswerti gebäude⛪.
So schnell und unkompliziert wie vo Armenie🇦🇲 noch Georgie🇬🇪 hemmer scho lang kei grenze 🛃meh passiert. D hauptstadt Tiflis isch üsen erste halt xi. Do hemmer nämli die notwendige sache wie z.b. bargeld 💶und sim charte guet chönne go bsorge. Da isch ezz au mol e stadt xi wo üs beidne richtig guet gfalle het und mir sehr gern besichtigt hend. Alt und neu, tradition und moderns hend schön harmoniert und es isch e dynamischi stadt. Ganz spontan simmer is bäderviertel und hend üs nocheme freie platz ime schwefelbad 🛁erkundigt. Sofort hends üs en prächtige ruum mit schwefelbad und verschiedene saunas🧖♀️ chönne aabüte und mir hend üs da gönnt. Dezue hemmer grad no e traditionelli peeling-massage buechet.
Hüt isches denn wieder chli abendtürlicher zue und her gange. Nochdem mir s permit im visitor center abgholt hend und üs bi de grenzpolizei👮♂️ aagmolde hend, hemmer is Vashlovani Schutzgebiet dörfe fahre. Für öppe 40km hemmer guet 3stunde brucht – isch e richtigi offroad piste do und het vorher nochli gregelet🌧. Somit isches au echli e matschigi rutschglegeheit xi. Da het zum thema passt, denn mir sind d „Mud volcanoes“ 🌋go aaluege. Witzigi, chliini schlammvulkän und e mega landschaft rundume – mir zwei ellei mit üsem bis ufe voll mit dreck gscheggetem tatütata🚒.
Fun fact: so zwei dreckspatze wie üs zwei hend die Masseure in Tiflis wohrschiinli scho lang nümme xeh… nochem peeling isch die ganz sunnebrüni🧔🏾👱🏽♀️ weg xi und mir sind ezz wieder bleichschnäbel🧔🏻👱🏻♀️
Mir hend no en huufe vor do in Georgie🇬🇪 – mir hend nämli no einigi tipps vo anderne reisende übercho. Simmer mol gspannt!
Liäbi grüess manuel & ilona
