Üsen erste stopp in Bulgarie🇧🇬 isch am strand🏖 vo Varvara xi. Begrüesst worde simmer do grad vome schwarm delfin🐬, wo verbizoge isch und eleganti sprüng usem wasser zeiget het. Tagsüber☀️ isches no agnehm warm xi, aber d saison vo de restaurant und hotel isch scho verbi und somit de schöni ort am meer🌊 praktisch menscheleer. Zum schwimme hemmer so guet ufd badhose🩱 chönne verzichte😉. Am obig🌙 jedoch ischs frisch und windig worde. Eimol sogar mitere sturmwarnig🌪, dass mir googlet hend, ab weler windstärki en camper🚒 chan umkippe. Es brucht uf all fäll meh als 90km/h und da het üs einigermasse beruhigt schloofe😴 loh.
Für en tagesusflug simmer uf Rezovo, es herzigs und verschloofes dörfli, wo direkt ade türkische🇹🇷 grenze liit und no de südöstlichsti ort vode EU🇪🇺 isch.
De küste entlang simmer denn uf Varna gfahre, i die maritimi hauptstadt vo Bulgarie🇧🇬. Do wohned üsi reisefrüünde Jhivko und Siana, wo mir letschte oktober🗓 unterwegs ide Türkei🇹🇷 kenneglernt hend. Sie hend üs wahnsinnig herzlich bi sich ufgnoh und es het sich vo afang aa agfühlt, als würd mer alti bekannti noch langer ziit endli mol wieder treffe. Bi spaziergäng ade uferpromenade entlang oder dur de park⛲️ und bim üs verköstige mit verschiedene bulgarische spezialitäte🌮🥣, hend sie üs ihri heimat zeiget. Am erste obig, hend mir ufs wiedersehe agstosse. Es hets en grosse salot🥗 und es glas (oder zwei, drü…) vodka geh. Am nögste tag simmer alli chli verkateret xi und hend echli glitte, so dass mir am zweite obig de vodka vorerst emol uf de siite loh hend😉.
En bsuech im retro museum, wo d ziit zwüschet 1944 bis 1989 zeiget, het natürli nöd dörfe fehle. Da isch die kommunistischi ziit, wo Bulgarie🇧🇬 en teil vo de Sowjetunion xi isch. Die Alltagsgegeständ und autos🚗 sind sehr schön usgstellt und gend iiblick is damalige lebe. De Jhivko het üs einiges dezue chönne verzelle. Au wenn üsi unterhaltig praktisch nur via google übersetzer📱 stattgfunde het, so het das echt guet funktioniert – sogar mit witz, ironie und technische informatione. Ebefalls sehr interessant isch de waldspaziergang xi. Da isch nöd en wald wie mer sich de vorstellt bestehnd us luuter bäum🌳🌲, sondern en steiwald. Über millione vo johr hend wind und wetter ihn gstaltet.
Fail fact:
So öppis isch üs bis ezz no nie passiert. Nochem geld💶 abhebe am bankomat vergessed mir eifach d kreditcharte💳 wieder entgege z neh und laufed weg ohni charte💳 im portemonnaie👛. E viertelstund spöter entdecked mir das unglück. Schnell zrugg zum geldautomat – d charte💳 isch aber weg, iizoge worde vom automat. Nochere wuche warteziit het üs die entsprechendi bank🏦 d charte💳 zum glück wieder chönne ushändige.
Gester hemmer üs vode Siana und em Jhivko nochere richtig tolle gmeinsame wuche verabschiedet. Danke eu nomol vielmol für eui gastfründschaft!🤗
D grenze noch Rumänie🇷🇴 hemmer ebefalls bereits via donau-brugg🌉 überquert. Siit langem simmer ezz mol wieder ime üs no unbekannte land – mir sind gspannt.😊
Liäbi grüess manuel & ilona
