Noch Istanbul🇹🇷 isches zügig und i grosse schritte uf Erzurum gange. Da isch e grösseri stadt im nordoste vo de Türkei. Do sind üsi Visa für de Iran🇮🇷 parat glege. D ilona het sich für die iranischi botschaft scho mösse angemesse kleide – aso verhülle. D hoor, de hals, d arme und d bei hend mösse vollständig mit langer, wiite bekleidig deckt si🧕🏼. Es isch e ziimlich ungwohnts und fremds gfühl xi für üs beidi. Ufem iranische konsulat hemmer grad no glück gha, dass mir no bedient worde sind, knapp vor fyrobig. Hüt hets aber erst es zetteli📄 mit de bankdate und em betrag zum go iizahle geh. Also guet isch de nögst gang zu de bank🏦 xi. Nochere ewigs lange schlange simmer ad reihe cho und hend d visa chönne zahle💶. Am nögste morge simmer beziite zum iranische konsulat und hend noch ca. emene stündli warteziit üses lang ersehnte visum ide händ gha. Freude herrscht!🥳
Am gliiche tag no, hemmer es türkischs bad🛁 gnosse imne Thermalbad. Üblich wär eigentli, dass männlein♂️ und weiblein♀️ getrennt wellnessed. Mir hend s familiebad buechet und hends so zemme chönne gnüsse.
Bevor mir in Iran🇮🇷 fahred, hemmer fürs Tatütata🚒 no en service wölle mache. Es sind ezz doch scho einigi 1000km🛣 wos zrugg gleit het, immer mol wieder au uf sehr holprige piste und wie mir ghört hend, segs im Iran eher schwieriger zum allfälligi ersatzteil z becho. Wa für es glück🍀 – per zuefall fahred mir anere nigelnagelneue peugeot-garage🦁 verbi. Mir hend ghalte und d mechaniker hend gfühlt alles stoh und ligge loh, nur für üs. Wiil mir churz vorem mittag aacho sind, hends üs grad mitgnoh zum mit ihne i ihrere kantine go zmittag🍲 esse.
De ganz nomi hemmer denn do im peugeot-huus verbrocht mit warte. Nebst eme ölwechsel hend nämli au die vordere bremsschiebe dringend mösse gwechslet werde – sind richtig porös xi! Churz nochem iidunkle isch s Tatütata🚒 wieder start klar xi. Bevors wiitergange isch, hets natürli de traditionelli Çay (tee)🍵 mit de nachtwächter und em mechanikermeister dusse vor de garage geh.
Ganz im süde und scho fast ade syrische🇸🇾 grenze liit Mardin🇹🇷. D altstadt isch an hügel baue und wunderschön. Nebst em bazar, verwinklete gasse hets au en huufe restaurant mit schöne terrasse. D umgebig isch wüesteartig🏜 und im summer wirds do glaubs richtig heiss.🥵
De abstecher zum Van-See het sich ebefalls sehr glohnt. Da isch de grössti see ide Türkei und de grössti Sodasee vo de Erde🌍. S wasser isch relativ alkalisch und fühlt sich seifig-schmierig🧼 aa. De geniali spot am südufer hemmer de erst tag leider gar nöd chönne gnüsse. Zum eine hets gschiffet🌧 und zum andere hemmer üs e mage-darm-verstimmig🤢🤮 iigfange gha. Erfreulicherwiis ischs bald berguf mit üs und d sunne☀️ het sich au no zeiged. Wenns morn nöd scho in Iran gängt, wäred mir ezz sicherlich no döt.😊
Fun fact: de manuel het de ilona grosszügig d spitze💇🏼♀️ gschnitte – ezz wo sie denn eh s hidjab🧕🏼 aahet, spielts jo kei rolle
Wie scho erwähnt, isch morn de grossi tag und mir reised in Iran🇮🇷 ii. So guet (resp. überhaupt) vorbereitet für es land wie ezz, simmer no nie xi. Fürd grenze hemmer en sogenannte „Fixer“ buechet, wo üs söll helfe mit dem ganze bürokratische🗃 züügs, so dass schneller und eifacher goth. Da isch übrigens de vater vom Hossein, wo üs bim Visum beaträge gholfe het. Mir sind zueversichtlich, dass alles klappet und freued üs druf!
Liäbi grüess manuel & ilona
