Was isch denn do los?! Männer mit turbans👳🏾♂️ in allne erdenkliche farbe, wild lebendi affen🐒, en elefant🐘 zmittst uf de stross, en goldige tempel🛕 und tuusigi vo heilige ratte🐀!
Ezz aber zerst langsam und vo vorne:
Vor es paar täg simmer no in Pakistan🇵🇰, ide stadt Lahore xi.
Sehr spektakulär isch do d grenzzeremonie am obig ade „Wagha Border“ zwüschet Pakistan🇵🇰 und Indie🇮🇳. Täglich, vor sunneuntergang chömed do masse a lüüt zemme, sowohl uf de pakistanische🇵🇰, wie au uf de indische🇮🇳 siite und lueged dere Tradition vom „Flagge abeloh“ zue. Nebst em luute getrommel🥁 und gejohle, sind die uffallende chopfbedeckige vo de uniforme, wo usxehnd wie en ufgstellte kamm vome güggel🐓, genau so en hingucker wie d gangart vo dene wächter.😉
Am nögste tag isches für üs über diä grenze noch Indie🇮🇳 gange. Es isch mol wieder relativ rasch und problemlos überd bühni.
Bereits ide erste Stadt, Amritsar, hemmer scho einiges dörfe entdeckte und erlebe. Dä „Goldig Tempel“🛕 isch s grösste heiligtum vo dä Sikhs und drum au en wichtige pilgerort fürd ahänger vom Sikhismus (religion). Prachtvoll ufem wasser und umgebe vome mächtige, wiise gebäudekomplex, befindet sich de „Goldig Tempel“ – wie e perle ide muschle.🦪
Ebefalls in Amritsar, isch uf e anderi art iidrücklich de hindutempel „Mata lal devi mandir“ xi. Ähnlich wie inere geisterbahn ufem johrmarkt wird mer do dur gäng und zum teil uf allne viere, dur höhlene gführt, verbi ade verschiedenste götterbilder und -figure.
Im naturschutzgebiet🏞 vo Harike simmer en huufe wild lebende affe🐒 und bunte vögel🦜 begegnet. De usgedehnti spaziergang ide grüene natur het richtig guet tue.
Wiiter ischs denn richtig Bikaner, wo mir s „Junagarh Fort“ – miteme audioguide uf dütsch – besichtigt hend. Sehr schöni, gschichtsträchtigi festigsaalag mit filigraner architektur.
Ide region befindet sich en nögste interressante tempel, de sogenannti „Rattentempel“🐀. Enere schätzig no lebed do ungefähr 20’000 heiligi ratte🐀. Da hemmer natürli mit üsne eigne auge wölle xeh. Und tatsächlich, springed do tausende vo dene nagetier ume. Anschiinend sölls glück🍀 bringe, wenn eim so es tierli überd füess huscht. Wie i allne anderne tempel, betretet mer au de tempel barfuess. Und streng gläubigi essed sogar s rattefuetter usem gliiche gschirr, wie d ratte selber. Irgendwo hets für üs aber sini grenze gha, alles mached mir nöd mit.😉
De erst iidruck vo Indie🇮🇳 isch eidütig entspannter als erwartet. En Kulturschock idem sinn hemmer nöd erlebt. Wohrschiinli het üs Pakistan🇵🇰 abghärtet und druf vorbereitet. Zudem simmer ezz in Rajasthan unterwegs, em gebiet vo Indie🇮🇳, wo am wenigste dicht bevölkeret isch. Trotzdem isch üsi neu hupi ständig im iisatz, aber mir meistered üs guet.💪🏼
Real facts🇮🇳: Indie het rund 1,4 Milliarde iiwohner (da isch öppe 175x so viil wied schwiiz) und isch somit noch China s zweitmeist bevölkerete land.
Mit knapp 40% het Indie weltwiit de grösst aateil a vegetarier ide bevölkerig.
D flächi isch mit 3’287’000qkm guet 80x so gross wied schwiiz.
Mir chönds selber no fast nöd glaube, aber jo – mir sind in Indie🇮🇳!
Liäbi grüess manuel & ilona
