S johr 2022
hemmer in Karimabad im einzige restaurant mitere richtig funktionierende heizig usklinge loh. Anstelle vo Rimus und Sekt hemmer mitem lokal brennte schnaps, em sogenannte „Hunzawasser“ aagstosse. S feuerwasser isch nochem örtliche fluss benannt.
Vo üsem „chüehlschrank“ us (so hemmer üsi unterkunft gnannt), hemmer chliineri tagesusflüg unternoh. Die beide Fort Altit
und Baltit
, wo en tibetische charme usstrahled sind guet z fuess z erreiche xi. Mitem Auto hemmer e tour richtig china
gmacht – bis öppe 50km vord grenze simmer cho. Ufem weg do ane simmer unter anderem am gfrorne Attabad-See verbigfahre, wo früehner bevors d stross
baue hend, die einzig möglichkeit xi isch, wiiter richtig chinesischi grenze z cho, i dem mer d fahrzüg über de see verschifft het. Oder wenn de see gnueg gfrore xi isch, heter quasi als stross dient.
En wunderbare blick uf de Passu-Gletscher, wo mit sine 24km längi öppe gliich lang isch wie de aletschgletscher ide schwiiz, het sich üs uf dere exkursion ebefalls bote. Schneeleoparde
, wo i dere Region heimisch sind, hemmer leider kei gsichtet. Es het aber au so en huufe z xeh und z stuune geh. Vo steiböck
, yaks über de klari, blaui Hunza-Fluss bis zu de gsamte atemberaubende, riesige berglandschaft
.
Ufem weg zrugg noch Islamabad hemmer en abstecher ines anders tal gmacht und sind uf Skardu gfahre. S coolste erlebnis do isch eidütig de usflug id wüesti
xi. D sanddüne sind mit schnee bedeckt xi, rundume verschneiti berge, sunneschii und „kein schwein“ isch ume xi. En ideale ort für e flitzigi schlittelpiste
. Uf plastiksäck simmer d hügel durabgsaust und hend choge de plausch gha.
Ezz simmer scho wieder ungefähr siitere wuche zrugg ide „wärmi“ (rund 10°C momentan), in Islamabad. Als ersts simmer do üses visum für Indie
go abhole – juhui es het klappet!
Ufem autobazar – en stadtteil, wos luuter shops mit verschiedenste autoteil git – hemmer die lüütisti hupi
gkauft, wos geh het. Diä hemmer im Tatütata montiert und sind so vorbereitet für Indie. Denn in Indie isch anschienend e möglichst luuti
hupi wichtiger als d bremse.
De bsuech ide Faisal-Moschee
, de nationalmoschee vo Pakistan
, isch mol öppis ganz anders xi. Sie isch us beton baue und vom design her inspiriert vome beduinezelt. Das Gebäude schiint sehr modern und wirkt uf de erst blick nöd unbedingt wie e moschee.
Mengmol chömed üs gueti idee und plän ändered sich. So hemmer eines regnerischen
tages ziit gnutzt und s visum für Nepal
beatreit. Und hüt hemmers bereits chönne in empfang neh – so schnell und unkompliziert! En abstecher noch Nepal zum chli go wandere
und d natur
gnüsse, stelled mir üs erholsam vor. Denn Indie wird üs wohrschiinli i verschiedene hinsichte nomol ziimli fordere.
Fun fact: s Tatütata
het es pakistanischs Tattoo becho. Wie die meiste lastwäge
und viili autos do, hemmer üsem Tatütata esone schöni, farbefrohi bemolig
mache loh.
Vorussichtlich werded mir öppe inere wuche via Wagah border noch Indie reise. Mir werded üs ezz nochli mental druf vorbereite.
Liäbi grüess manuel & ilona
