Im chliine Mienedörfli Sapphire wird, wie de name errote loht, no mit immer grossem erfolg nochem edelstei saphir💎 gschürft. Das örtli wirkt zwor es bizzeli wie ide ziit stoh bliibe. Praktisch i jedem garte xeht mer gruebene und rostigi fahr- und werkzüüg⛏, wo fürs „fossicking“ – wie das sueche und sammle noch mineralie, edelstei💎 und fossilie gnannt wird – verwendet werded. Es git jedoch en huufe lüüt, wo do für einigi wuche ferie mached und täglich mehreri stunde siebled. Mir hend ungefähr zwei stunde gschürft und sogar es paar chliini, blaui, gläserni exemplar💎 gfunde.
Für üs ischs denn in grosse schritte zrugg wieder noch Ipswich zu de Ingrid (tante vo de ilona) und ihrem maa, em Brian. Mir sind wieder sehr ♥️lich empfange und ufgnoh worde.
Vo do us hemmer verschiedeni tagesusflüg unternoh. Eimol simmer an kulissehafte lake Moogerah🏞 gfahre und hend e kajaktour🛶 gmacht.
Es wiiters erlebnis isch s NRL🏉 game xi, wo mir live „Redcliff Dolphins“🐬 gege „Gold Coast Titans“ im stadion🏟 sind go luege. NRL – national rugby league, isch die höchsti rugby league in Australie🇦🇺 und eini vo de beliebtiste sportwettbewerb.
Es isch krass zum xeh, mit wa fürere heftigkeit die spieler ufenand treffed, ohni körperschoner. Mengmol het mer sogar d knoche🦴 ghöre knacke bime ufprall. D atmosphäre im stadion🏟 isch richtig guet xi. Gwunne hend ganz knapp d „Redcliff Dolphins“, für die hemmer gfanet.
So nöch am meer🌊, het en tagesusflug ufem boot nöd dörfe fehle. Ufeme katamaran🛥 simmer uf höchi Moreton island gfahre und hend do buckelwal🐋 chönne beobachte. Jedes johr im juni started tuusigi vo buckelwal🐋 ihri langi reis vode Antarktis bis ufd höchi vo Queensland. Do im wärmere gwässer paared sie sich, bringed jungi zur welt und mached sich denn im oktober, wenn die chliine gnueg chräftig sind, wieder uf de weg in süde🧭 – tausende vo kilometer. Es isch wahnsinnig iidrücklich xi, dene riese so nöch chönne zi. Immer wieder het mer ahand vonere fontäne, de sogenannti blas🌬, ghört und xeh, wenn en wal🐋 direkt nebed em boot🛥 uftaucht isch. Ab und zue hends mit de schwanzflosse ufs wasser klatscht oder hend sogar en grosse sprung id luft gmacht!
Ide vergangne täg sind mir mit de Ingrid im inland ide region vo Warwick und em Granite Belt i verschiedene nationalpärk🌱 unterwegs xi. Bsundrig isch s treffe mitere aboriginal frau xi, wo üs en iiblick i ihres naturverbundne lebä geh het. Igstumme het sie üs mit ihrem gsang🎵 und jede vo üs het e traditionelli gsichtsbemolig💄 übercho. Und so simmer denn barfuess👣 los ufen bush-walk.🌱
Fun fact: üsi allererste golferlebnis⛳ hemmer letscht wuche in Warwick gmacht. Dementsprechend hend mir üs au agstellt. Zum glück sind nebst üs fast kei gäst ufem golfplatz xi und so isches nur halb so peinlich xi, wenn mer 10x usgholt het für en abschlag🏌🏼♀️ und de ball no immer nöd troffe het.🤣
Am donnstig goth üsen flug✈️ und mir werded üs wieder uf de weg noch Kathmandu🇳🇵 zu üsem Tatütata🚒 mache.
Liäbi grüess manuel & ilona
