Ide vergangne täg hemmer sehr viil programm gha und hend für üsi verhältnis en huufe städt🏙 mit ihrne burge🏰 und tempel🛕 besichtigt.
Als ersts simmer id stadt Jaisalmer, wo ide Thar-Wüesti🏜 liit. Die burgaalag do isch riesig und wirkt meh wie es dörfli. Sie isch no bewohnt und het e grossi uswahl a lädeli mit kunsthandwerk🎨🖌 und souvenirs. Ebefalls innerhalb vo dere imposante burgmuur gits mehreri, verschiedeni tempel🛕.
Vom Mehrangarh Fort in Jodhpur hemmer e wundebari sicht uf die „Blaue Stadt“ gha. So wird d stadt Jodhpur au gnannt, wiil die meiste hüüser🏠 blau aagmolet sind. Früehner het das anschiinend e bedütig gha fürd zueghörigkeit zume bestimmte kaste.
Noch blau chunnt pink… Jaipur isch d hauptstadt vo de region Rajasthan und heisst au „Pink city“ ufgrund vo de viilne gebäude, wo do usem rot-rosafarbene stei baue worde sind. I dere stadt🏙 simmer unter anderem z fuess am Sunne-Tempel verbi, zum Affe-Tempel spaziert. Tausende vo affe🦍🐒🦧 hend do ihres dihei und freued sich über jede tourist, wo ihne öppis z knäbberle🍌🥕 mitbringt.
De Taj Mahal, eis vo de siebe neue weltwunder, ide stadt Agra isch natürli fast ein muss xi. Mir hend das wahnsinnig iidrückliche, freistehende elfebeiwiise bauwerk, ide obigsunne☀️ mit wolkelos blauem himmel uf üs wirke loh. En muslimische grossmogul het das mausoleum im johr 1631 zum bau, fürs grab vo siner lieblingsfrau, in uftrag geh. Nochdem mir dur die grossi, parkähnlichi⛲ aalag gschlenderet sind, hemmer üs ufes bänkli mit blick zum Taj Mahal gsetzt und dem ganze triibe es guets stündli zueglueget. Absolut sehenswert!
Denn ischs chli offeherziger worde. Im städtli Khajuraho simmer bide „Kamasutratempel“ xi. Die tempelgruppe🛕 isch übersät mit filigran gmeislete forme und figure und sind es UNESCO-weltkulturerbe. En teil vo dene kunstwerk zeiged liideschaftlichi, eng umschlungni pärli👫, wobi s mengmol meh nochere aaspruchsvolle turnüebig usgseh het und nur scho bim aneluege muskelkater geh het.
Es isch nöd nur s grosse agebot a sehenswürdigkeite xi, wo üs zügig vo de einte stadt🏙 idi nögsti brocht het, sondern au s problem en geeignete stellplatz🏕 z finde. Meistens sinds bis ezz parkplätz🅿️ vo hotels oder tankstelle⛽ xi. Fast nirgends het mer entspannt für es paar täg chönne campiere🏕, so dass mir halt am liebste unterwegs xi sind. Mit de ziit wird das jedoch astrengend und mer sehnt sich nocheme plätzli ide natur, wo mer eifach emol es bizzeli für sich chan sii, relaxe und dureschnufe.
So hemmer die rund 1500 kilometer as meer🌊 in agriff gno und sind i drü täg, mit je 9-10 stunde fahrt an strand „düst“🚒. Ezz simmer chli nördlich vo Goa, ame einsame, wunderschöne strand🏖. Genau so öppis wie mir brucht hend! Es isch richtig läss zum wieder mol dörfe ide badhose👙 und de churze chleider👗🩳 umerenne. Hüt hemmer üsi erst kokosnuss🥥 gnosse. Mitem bohrer hemmer zerst es loch bohret zums kokoswasser chönne trinke und denn mit hilf vom hammer🔨 hemmer sie ufbroche zum as fruchtfleisch z cho. S schwiizer sackmesser isch ebefalls iigsetzt worde. Mir hend üs denn gfroget, wie en profi echt e kokosnuss isst?!🤔 Wie au immer – üs hets gschmeckt.😋
Fun fact: Es hend lang nöd alli Inder🇮🇳 englisch chönne rede, wo mir troffe hend. S wort „selfie“🤳🏽 cha jedoch jede Inder froge. Öb das de tankwart, d kassiererin im supermarkt, de töfffahrer🏍 uf de stross nebed eim oder s schuelmeitli👩🏾🎓 ufem heiweg isch. „Selfie?“ „Selfie?“ „Selfie?“ Als tourist bisch do d attraktion selber und jede möcht es föteli📸 mit dir.
Mir hend einigi tipps vo bekannte und verwandte übercho für Indie🇮🇳 – a dere stell nomol herzliche dank eu allne!🙏🏼 Es hets üs dütlich vereifacht zum prioritäte setzte und e ungefähri route📍 chönne z plane für e sone grosses land.
Liäbi grüess manuel & ilona
