Einfach mal reif für die Insel🏝…
Uf de delfinförmige insle🏝 Qeshm hemmer no wiiteri schöni fleckli entdeckt und erkundet. Die formeriich Chahkooh-Schlucht, e bootstour🛶 dur de grössti Mangrovewald vom persische golf und de wunderschöni sunneuntergang🌅 im traditionelle, historische fischerdörfli Laft, wo am tag wie usgstorbe wirkt und ide dämmerig zu vollem lebe erwacht.
Denn ischs zrugg ufs festland, aber nur für es paar stündli. S Tatütata🚒 het do mösse bliibe, während mir mit ruggsack🎒 und velo🚲 die nögsti fähre uf die nögsti insle🏝 gno hend. Unterschlupf hemmer für zwei nächt im guesthouse vom lokale künstler Ali gfunde. Die chli, zauberhaft insle🏝 Hormus het sich guet i eim tag mitem velo🚲 umrunde loh. Es git so guet wie nur ei stross und noch öppe 25 kilometer isch mer wieder a dem punkt, womer gstartet isch. Trotz de chliine flächi het d insle🏝 Hormus einiges a landschaftliche schönheite z büüte.
Vo grosse Salzkaskade us versteinertem salz🧂, über s „Rainbow valley“ 🌈mit farbeprächtige berge ide tön vo rot-violett-gelb-ocker-blau, zu de schneewiise „Snowy mountains“, wiiter zum „Red Beach“ us rotem Sand und viilne wiitere iidrückliche phänomen. Dur da mir ide letschte wuche nümme würkli sportlich aktiv xi sind, het üsi kondition rapid abgnoh. Mir sind ziimli gschluuchet🥵 xi noch üsere velotour – de gegewind🌬 isch aber au mega starch und fies xi😇. Mit zwei wiitere pärli hemmer de obig bi lokalem esse und tolle gspröch, bis wiit noch mitternacht usklinge loh.
Wieder bim Tatütata🚒 ischs uf vier räder wiiter gange, am persische golf entlang bis zu de gschätz schmalste stell zwüschet em iran🇮🇷 und de arabische halbinsle. Nichts ahnend simmer do anere „schmugglerküste“ glandet. En iiheimische het üs offe verzellt, wies lauft. Die einte verschiffed geisse🐐 und schöf🐑 mittels böötli. Und es paar hundert meter wiiter hemmer chönne beobachte, wie tonnewiis diesel, 60km in richtig Oman🇴🇲 transportiert worde isch. Geg die 120 manne hend total organisiert, die ca. 60 speedböötli🚤 mit diesel belade, mittels traktore🚜 iigwasseret und ab ging die post… die leere böötli🚤 sind wieder zrugg cho und s spiel het vo vorne aagfange. I ihrer bekleidig mit ihrem tuech um de chopf, so dass mer praktisch nur no d auge xeh het, hend die manne fast echli wie pirate🏴☠️ gwirkt.
A dem strand isches s erste mol xi siit üsere reis, dass mir zemme musig🎶🎵 gmacht hend – mit handpan, panflöte, hornpipe. Sogar scho publikum und üsi erste fans hemmer gha. Zwanzg jungs usem dörfli, wo uf de töff🏍 deher cho sind, hend üs fasziniert zuegloset, gfötelet📸 und gfilmet.
In Minab simmer ufem bekannte „Thursday market“ xi – en grosse wuchemarkt. Uffallend sind vor allem die viile traditionell gkleidete fraue xi – vo chopf🧕🏾 bis fuess🦶🏾 i farbige tüecher iighüllt und schön verzierti gsichtsmaske.
Wiils üs ide Tezerj Oase so guet gfalle het, hemmer do nomol es paar täg verbrocht. En mega paradisische ort!🌴
Momentan simmer ide nöchi vo de stadt Kerman uf öppe 3000 m.ü.M und hend en wunderbare blick uf schneeberge🏔. Bim spaziergang vorher simmer ame bächli entlang gloffe, wo teils gfrore🧊 isch. Mir rechned mitere ziimli chalte nacht hüt. Zum glück simmer guet usgrüstet und d dieselstandheizig♨️ funktioniert au no tipptopp – hemmer vor es paar täg mol wieder testet.😉
Fun fact: Mengmol schiints eso, als wär de tuschhandel do no gar nöd so lang her. Zum biispiil, wenn mir tankfüllig⛽ mitere hand voll mandarinli🍊 zahled oder mir im supermarkt anstelle vom retourgeld zwei schoggiriegel🍫🍫 überchömed.
Für die kommende täg stoth no e tour durd wüesti🏜 Kalut ufem programm und denn goths au scho glii ad grenze🛃 noch pakistan🇵🇰. Üses iranische visum lauft nämli am 08.12.22 us.
Liäbi grüess manuel & ilona
