Vo montenegro
simmer noch albanie
und hend ohni gross en plan d grenze überschritte und sind am gwässer gfolgt. S ziil isch xi vom salz
– zum süesswasser z cho. Mir sind öppe 2 stund ufere schotterpiste mit viilne schlaglöcher
und engpäss gfahre bis mir üses perfekte plätzli am ufer erreicht hend. Echli stutzig hets üs uf de strecki gmacht, dass üs eine aghalte het und üs es fähreticket
het wölle verchaufe…hmm?
Am nögste tag hemmer üs denn mol erkundigt und festgstellt, dass mir bim Komanstausee und inere sackgass gstrandet sind. Also hemmer i dem fall doch es fähreticket gkauft. Nochere übernachtig ganz ellei uf de fähre
ade aalegestell, isch das schiff am nögste morge richtig be- respektive überlade worde mit wiitere fahrzüüg 
. Landschaftlich isches es highlight xi durch engi schluchte und a mehrere hundert meter hoche felse 
verbii z fahre. Noch 2,5h ufem wasser hemmer s ufer alli wieder heil erreicht. Immer no ohni plan, aber ufgrund vo einige empfehlige simmer is idyllische Valbonatal mit iidrückliche berge und täler, wo sich ide südöstliche albanische Alpe
befindet. Do hemmer e herrlichi wanderig uf de Valbonapass (1795 m.ü.M) gmacht und aagnehm chüehli nächt verbrocht, so dass mir sogar d wulledeckene hend mösse füre neh. Dass mir do wieder inere sackgass glandet sind, hemmer erst gmerkt, wo mir wiiter in süde vo albanie und wieder as meer 
hend wölle. Die einzig richtig stross führt nämli nur über kosovo
. Also gut – auf gehts!
Wieder in albanie hemmer d hafestadt Durrës aapeilt. Eis wohrzeiche vo do isch es römischs amphietheater, wo mir unter anderem sind go aaluege. Z fuess
sind mir dur d gasse gschlenderet, hend bier
ide strandbar trunke und byrek & glace
gesse.
Hüt isch de ersti tag uf üsere reis, wos richtig regnet
. Mir sind durch Tirana, d hauptstadt vo albanie, und denn wiiter noch süde gfahre. Jetzt simmer ame strand echli unterhalb vo Spille. So wies usgseht, muess do echt was los si, wenns wetter
passt. Momentan simmer fast die einzige. Mitem Luigi, eme streunende welpe, simmer z dritte ufem platz
Fun fact 1: s sunnesegel 
spendet schön schatte, chostet aber au nerve bi de immer gliiche frog „bisch so im schatte?“ – „nei, nonig“ – „chum mir zügled de tisch und d stüehl“
Fun fact 2: wer s tatütata
chan fahre, chan au e fähre stüüre. Uf üsere fährefahrt isch d ilona de kapitän xi und het s stüürrad id hand gno.
Üs gfallts sehr guet do in albanie und werded die nögste täg no i dem vielfältige und für üs unbekannte land verbringe.
Liäbi grüess manuel & ilona
