Einfach mal ne blutige🩸 sache…
Vo Noosa us isches wiiter über Hervey Bay via Bundaberg noch Agnes Water. Do ganz vorne uf de landzunge🏖 befindet sich s örtli 1770 (Seventeen Seventy), wo de captain James Cook anno dazumal s erst mol s land vo Australie🇦🇺 betrete het. En churze spazierweg führt zu verschiedene ussichtspünkt und mer cha sich vorstelle, wa für es unglaublichs gfühl das het mösse sie, do azcho noch monatelanger schiffsreis🚢.
Nebst vielne sunnige☀️ und warme täg, hemmer ide vergangne wuche au zwei-drü nebligi🌫 und regnerischi🌧 täg gha. Zu dem ziitpunkt hend mir üs im regewald vom Eungella Nationalpark ufghalte. Die region isch bekannt für Platypus (Schnabeltier), es eigenartigs wese, wo nur in Australie🇦🇺 verbreitet isch. Da sind eierlegendi🥚 säugetier, wo ähnlich usxehnd wie biber🦫 mit enteschnabel🦆. Ide dämmerig, wenn sie aktiv werded hemmer tatsächlich es paar vo dene lustige tierli entdeckt.
Trotz nassem wetter hemmer chli öppis wölle unterneh und erlebe. Wie fast überall gits guet usgschildereti🚸 und schön gmachti weg, so dass mir d gegend echli sind go erkunde. Rege🌧 macht üs jo nünnt us – hemmer denkt. Allzu wiit simmer jedoch nöd cho, denn d bluetegel hend üs überfalle! D ilona het fast krise übercho, wo sie die wurmartige🪱 viecher xeh het i ihri schueh🥾 inechrüche. Wegspigge oder abschüttle, wie sus chäferli🪲 oder so, isch fast nöd gange. Bluetegel muesch richtig wegzupfe und bisch eine los, hesch zwei neui, wo sich a dir festbisse hend – wääh gruusig! So schnell mir hend chönne simmer usem wald🌳🌲, hend üs d schueh🥾 und d chleider👕👖 vom liib griisse und üs vo de restlie bluetegel befreit.
Nochem regewald isches wieder ad küste. In Cape Hillsborough simmer zum sunneufgang🌅 an strand. Nebst de schöne, morgendliche stimmig, begegnet mer do nämli wallabies und kängurus🦘 am strand🏖. Es isch es bsundrigs erlebnis, es känguru am meer🌊 entlang hüpfe z xeh.
Australie🇦🇺 isch es beliebts reiseland bi backpackers🎒. Da hend mir vor allem in Airlie Beach miterlebt. Die stadt lebt hauptsächlich vom tourismus, denn vo do us gits die verschiedenste aagebot mit boots⛵🚤- und schnorcheltoure🤿 zu de Whitsundays, e inselgruppe🏝.
Miteme andere schwiizer pärli, wo mir unterwegs kenneglernt hend, hend mir gmeinsam sonen tagesusflug buechet. Ufs schnorchle🤿 im great barrier reef 🐡🐠hend mir üs speziell gfreut und sind denn leider chli enttüscht worde. En grossteil vo de koralle isch kaputt xi, es isch viel weniger farbintensiv xi wie erwartet und het echli wie usgstorbe gwirkt. Umso überraschender isch de Whitehaven beach🏖 xi – so kitschig, unwürklich schön! Villicht chunnt eu de riesigi, wiisi strand mit dem hellblaue-türkisfarbene wasser bekannt vor. Do isch nämli „Fluch der Karibik 2“ dreiht🎬 worde.
Fun fact:
Üsi erste angelversüech🎣 sind am strand bim Cape Palmerston xi. Wie sich nochträglich usegstellt het simmer am komplet falsche ort gstande. Denn bi üsem spötere spaziergang am meer entlang, simmer anen fluss cho, wo die fisch🐟 xi wäred. Mir glaubed sogar zghört ha, wie d fisch🐟 üs usglachet hend😅
Bis ende juni🗓 werded mir wiiter nordwärts hebe. Lässig wär, wenn mir Cooktown erreiche chönnted – üses nördlichste🧭 ziel.
Liäbi grüess manuel & ilona
