Lahore ischs herz♥️ vo Pakistan🇵🇰 und mit rund 11 millione iiwohner die zweitgrössti stadt. Do hemmer üs mitem Atif und em Salman troffe, zwei Pakistaner, wo Lahore in und uswendig kenned. Sie hend mit üs e food-street-tour🍗🍛 gmacht und mir hend so en huufe verschiedeni spezialitäte chönne probiere. Es isch frisch zuebereitet und richtig lecker xi. Vonere traditionelle suppe, über scharf🌶 gwürzts chicken, öppis gmüesigem🥬, frischem fladebrot bis zum spaghetti-glace🍨 zum dessert isch alles debi xi.
Am nögste tag hemmer verschiedeni sehenswürdigkeite besichtigt; die riesig, us rotem sandstei erbauti Badshahi-Moschee🕌, s imposante Lahore-Fort und de Minar-e-Pakistan, s offizielle wohrzeiche vo Pakistan🇵🇰. Im national-historische Museum hemmer einiges a gschichtlichem hintergrund erfahre und wie Pakistan🇵🇰 im johr 1947 entstande isch, idems sich vo Britisch-Indie🇮🇳 abgspaltet het.
Eimol meh hemmer üs irgendwie de mage verdorbe. Ufgrund vom wasser🚰 oder isches gliich s streetfood🍗🍛 xi? – mir wüsseds nöd. Üs hets uf all fäll so dureputzt wie no nie und sind ezz noch öppe zäh täg langsam wieder fit. Die erste täg sind bsunders schlimm xi und mir hends liegend im hotelzimmer🛏 verbrocht. Länger hemmers do jedoch au nöd usghalte und üs usem hotel is Tatütata🚒 gschleppt. Uf de wiiterfahrt hemmer all 10km mösse halte und e stündigi schloofpause😴 iilegge, wiil mir so erschöpft xi sind.
Mit müeh und not hemmer denn Islamabad, d hauptstadt, erreicht. Do hemmer s erst mol siit mir in Pakistan🇵🇰 sind, chönne frei stoh mit üsem Tatütata🚒. Wildcampiere isch bis ezz so guet wie nöd möglich xi. Üses hauptziel in Islamabad isch s beaträge vom indische visum🇮🇳 xi. Noch dere bürokratie, wo ungefähr 6 stund duuret het, hemmer wieder öppis grosses zum abhogge✅ gha. Bis mir bscheid überchömed chans 1 wuche oder aber au bis zu 5 wuche goh. Viil hemmer sus nonig xeh und möge unterneh i dere stadt, aber da werded mir zume spötere ziitpunkt chönne nohole, wenn mir üses Indie-visum in empfang nehmed.
Jetzt simmer nämli im norde🧭 vo Pakistan🇵🇰, im Karakorum gebirge🏔 unterwegs, ganz ide nöchi vom Himalaya gebirge. Es het vier ganzi täg duret bis mir Karimabad erreicht hend. Es dörfli uf 2500m, umgebe vo schneebedeckte bis zu 8000m hoche berge🏔 und 150km vo de chinesische🇨🇳 grenze entfernt. D landschaft isch unglaublich schön und es tuet richtig guet die frischi luft, das panorama und d entschleunigung, Natur pur – weg vo de städt🏙 mitem smog und de viile lüüt.
Mit üsem reisegspänli-paar hemmer üs für überd festtäg e „air b&b unterkunft“ gmietet do obe. D Winterstimmig❄ isch bi üs eidütig au aacho. Ide nacht hemmer bis zu -20°C🥶 und es richtigs heizsystem gits idem huus nöd. Eifachi gasöfeli, thermowösch, bettfläsche, tee trinke🍵 und kuschele git üs echli warm. Flüssend wasser💧 geschweige denn heisses wasser isch zur ziit ebefalls fast unmöglich, wiil d leitige ständig zuefrüred🧊. Und strom🔌 gits für zwei stund am tag. Üs gfallts trotzdem und mir gnüsseds.😊
Für wiehnachte hemmer guetzlet🍪, s „bäumli“🎄 gschmückt und üs mit wiehnachtslieder📻 beschalle loh. Gest hets zur feier des tages zum znacht e leckers fondue🫕 geh.
Fun fact: mitem alter wird mer bescheidener; uf de geburtstag het d ilona vom manuel 10 rolle wc-papier🧻 und 10 liter suubers trinkwasser🚰 übercho… wa für e genials und praktikabels gschenk🎁
Mir wünsched eu und eune familie en entspannte schlussspurt im 2022 und alles gueti fürs nögste johr!🍀🥳
Liäbi grüess manuel & ilona
