Mittlerwiile finded mir üs doch relativ guet z recht im Iran🇮🇷 und kenned die wichtigste spielregle. Ab und zue simmer zum picknicke, eme tee🍵 vor ort oder zu iiheimische hei iiglade worde. Das sind sehr schöni begegnige xi. Mengmol wirds aber au fast zviil. Zum biispiil, wenns eim kum meh go lönd und am liebste hetted, dass mer bi ihne, mit de ganze sippschaft, unter eim dach schlooft.💤
D stadtfüehrig dur Isfahan, wo für die persischi architektur🕌 bekannt isch, isch sehr spannend xi. Da hend mir natürli au üsere tolle guidin z verdanke, wo üs en huufe zeiget und verzellt het.
Für es richtig klassischs wüeste-feeling simmer id Varzaneh-Wüesti🏜. Do het mer bis ad sanddüne chönne fahre und am fusse vo dene sandhügel nächtige. Zum sunneufgang🌄 (es isch richtig chalt xi) simmer die grosse sandberge duruf gkletteret und hend de erst kaffi☕ vom tag, binere wahnsinnige sicht uf e wiiti voller sand gnosse.
Im oasedorf Garmeh chamer die einstigi blüeteziit nur no erahne. Es isch zwor wunderbar glege, mit viilne palme🌴 und enere warme wasserquelle. I dem teich lebed en huufe sogenanti „doctor-fish“👨🏼⚕️🐟, wo eim die alte huutschüppli und de dreck vo de füess🦶🏼 knäbberlet. Da isch sochli s highlight do momentan, denn de rest isch leider ziimli am verfalle. Üs hets trotzdem guet gfalle do!😃
Eigentli sind mir nöd so die städtebsuecher, aber d wüestestadt Yazd hemmer wölle xeh. Sie isch eini vo de älteste städt im Iran🇮🇷 und ihri altstadt isch mit ihrere lehm- und rohziegel🧱-architektur als weltkulturerbe erklärt worde. S schlendere dur de wunderschöni bazar und die viile chliine, enge gässli cha schomol dezue füehre, dass mer d orientierig verlürt. D windtürm (Badgir gnannt) verschönered nöd nur s stadtbild, sondern sind e usgeklügelti, geniali erfindig zum frischi, chüehli luft🌬 is huus z bringe – ganz ohni strom!
Es bizzeli usserhalb vo de stadt stönd „Türme des Schweigens“🤫, wo de zoroastriern früehner als stätte für himmelsbestattig dient hend. De zoroastrismus isch e religion, wo do verbreitet xi isch, bis d araber de islam is land brocht hend. Die baute sind ebefalls sehr iidrücklich, jedoch irgendwie au echli gruselig👻. Denn die nackte liichene sind do obe uf dene türm anegleit worde, so dass nur die aasfressende vögel🦅 dezue cho sind und bis uf d knoche🦴 alles weggfresse hend. Siit 1970 isch die art vo bestattig im Iran us hygienische gründ jedoch verbote. Hie und da hets nämli scho au chönne vorcho, dass d vögel🦅 liichestückli vom himmel falle loh hend…
Uf de fahrt in süde🧭 richtig persische golf, simmer nomol uf e traumhafti oase gstosse; palmewald🌴🌴, wasserfall und flüssend warms, natürlichs wasser – ideal zum bade🛁 und wösch wäsche🧺. A so plätzli loht sichs immer guet es paar täg ushalte und mir chömed zur rueh, um die viile iidrück uf üs wirke z loh und z verarbeite.
Zur ziit simmer grad uf de insle🏝 Qeshm unterwegs. Da isch die grössti insle im persische golf⛳🏌🏽♂️. D distanze uf de insle sind viil chürzer, d mensche viil braungebrannter🧕🏾 🧑🏾🔧 und d temperature viil heisser🌡 – irgendwie fast wie inere andere welt. S meer🌊 isch herrlich und d sunneuntergäng🌅 traumhaft. Es isch es naturparadis do mitem „Star valley“⭐, de salzhöhlene🧂 und de wunderschöne stränd🏖 im weste vo de insle.
Fun fact: die wilde kamel🐫🐪 hemmer unterdesse nöd nur us de ferni xeh, sondern au scho i unmittelbarer nöchi, uf de stross, nebed em tatütata🚒 dörfe erlebe und au usem topf🥘. Es het üs erstuunlich guet gschmeckt😋, isch sehr zart xi und het üs echli ad wildsaison🦌🐗 dihei erinneret…
Glücklicherwiis hemmer beidi s pakistan🇵🇰 visum erhalte. Dank em Paul Rüegg, üsem fähnrich usem musigverein🎶🎵, simmer bereits ezz mit zwei pakistaner in kontakt – Merci nomol viilmol fürs vermittle!
Liäbi grüess manuel & ilona
