In Rishikesh, de yogahauptstadt🧘🏽♀️ vo de welt, sind mirs mol wieder musikalisch🎵 agange und hend de „Beatles Ashram“ besichtigt. Da isch en art e residenz, schön am fluss Ganges und echli abseits vo de stadt im grüene🏞. Ide 1960er und 1970er isches als „Internationale Akademie für Meditation“ s usbildigszentrum für d schüeler vom Maharishi Mahesh Yogi xi. Im früehlig 1968 hend „The beatles“ do, nebst anderne internationale bekanntheite, meditation studiert.
Ezz xeht das ganze es bizzeli verwilderet us – wie en „lost place“ mit viilne touriste. Mer cha sich aber trotzdem immer no guet vorstelle, wies chönnti xi si, wo dazumal de John Lennon, de Paul McCartney, de Ringo Starr und de Harrison ame so idyllische ort meditiert hend.☺ „Let it be…“🎤🎵
De fluss Ganges isch ide nögste täg stets en erfrischende begleiter xi. Bim städtli Shivpuri hemmer direkt am ufer🏖 vom Ganges chönne parkiere und hend do es paar täg verbrocht. Am sandstrand höggle, lese📖, sunne☀️ tanke und sich nocher im chüehle nass erfrische. S wasser💧 isch klar, (erstuunlich) suuber und relativ chalt xi – und heilig! De über 2600 kilometer langi fluss isch de heiligsti fluss vo de hindus🕉. Es bad in ihm söll eim vo de sünde rein wäsche.
Indie🇮🇳 isch sehr vielfältig a flora🌺 und fauna🐘. Xeh und erlebt hemmer bereits s meer🌊 mit de wunderschöne stränd🏖, d flüss, die grüene felder🌱, die dschungel-artige wälder, die heissi, sandigi wüesti🏜 und en huufe wild lebendi tier🐆🦜. Wa ezz no gfehlt het, sind d berge🏔. Au die ghöred zu Indie🇮🇳. Ime chliine skigebiet namens Auli simmer am aafang vom Himalaya-Gebirge🏔 xi und so sogar nochli in schnee🌨 cho. D wanderig ide frische bergluft het echli heimatgfühl ufcho loh. Vo do us hemmer au en wunderbare blick uf de zweithöchsti berg Indiens🇮🇳, de Nanda Devi🏔, gha.
Am 08.03.23 isch „Holi“, s fest vo de farbe🎨, em früehlig💐 und de liebi💘 xi. Das isch eis vo de wichtigste fester im hinduismus🕉. Natürli hemmer do wölle debi si und sind so wieder zrugg, abe uf Rishikesh. Do hemmer ufeme camp🏕, am Ganges, unter luuter locals, zwei täg lang „Holi“ gfiiret🥳. Nebst luuter musig🎵, tanz🕺🏾, em „holi-funke“🔥, guetem esse und trinke, isch logischerwiis au viil farb🎨 wichtig xi. Mer het sich mit de wort „happy holi“ gegesiitig gelbs, grüens, pinks, rots und violetts farbpulver is gsicht gstriiche und demit beworfe. Da ischs „farbe-holi“ xi. Anschlüssend het mer sich ebefalls wieder gegesiitig mit wasser💧 besprützt oder im fluss Ganges gwäsche – da isch denn s „wasser-holi“ xi. S traditionelle getränk bhang-lassi (milchdrink mit cannabis) het ebefalls nöd gfehlt. Zemmefassend chamer sege, es isch sehr insbrünstig und intensiv zelebriert worde – farberuusch.😇
Next step👣:
Die frog⁉️ stelled mir üs i letschter ziit öfters. Gern würded mir a üsem ziil, Australie🇦🇺, festhebe. Zur ziit sind d landgrenze zu Myanmar🇲🇲 no zue, aber es git aazeiche, dass diä de früehlig öffned. Denn wär da üsi erst priorität, zum via landweg uf südostasie z glange. E wiiteri option, wo für üs eher nöd in frog chunnt, wär s verschiffe⛴ vo Mumbai (Indien🇮🇳) noch Malaysia🇲🇾. Wiil mir de ganzi weg mit üsem Tatütata🚒 wieder hei fahre möchted, isch üs de weg jedoch z chostspielig. D alternative für üs, falls Myanmar🇲🇲 nöd uf tuet ide nögste zwei mönet, wär, dass mir s Tatütata🚒 in Delhi (Indie🇮🇳) am flughafe iistelled und uf Australie🇦🇺 flüged✈️… es isch no sehr viil offe, wies wiiter goth, aber es bliibt spannend😉
Vor wenige stund hend mir Nepal🇳🇵 erreicht und freued üs uf üses nögste abendtür.
Liäbi grüess manuel & ilona
