Fürs wüeste-erlebnis
ide Kalut hemmer üs miteme pärli verabredet, wo mir dazumal in Istanbul
kenneglernt hend. Ebefalls sind no zwei tramper mitcho und so simmer es bunt gmischts grüppli xi und hend e tolli ziit mitenand gha. De jungi Hippie-Velofahrer 
us Dütschland
, wo sini gross lieäbi♥️ vergesse will; de französischi
autor, wo es buech
über d reis dur de Iran
schriibe möchti und so siim idol folgt; s pärli, wo sini zelt ide schwiiz
abbroche het und sich ufem weg noch Kambodia
befindet zum döt sich nieder zloh und mir zwei. So verschiedeni gschichte und beweggründ, lüüt wo ihren traum lebed, treffed sich do ide Kalut-wüesti, ein vo de heissiste ort uf de erde
.
Im summer ischs do bis zu 70°C heiss. Ide wintermönet jedoch isches sehr agnehm um die 25°C. Die erst Nacht hemmer bi de „sand castles“ verbrocht, miteme traumhafte sternehimmel
und eme sehr stimmigsvolle sunneufgang. D gegend wirkt mit dene uf natürlichi art entstandne „Sandburge“, wie es riesigs feld voller burgruine us langer, scho fast vergessner ziit. Üses tagesprogramm isch xi wie ime richtige outdoor-camp
; Brennholz sammle, brot bache, musige, offroad fahre, dass nur so stüübt und de ganz sandstaub dur alli ritze is Tatütata
chunnt und am obig gmüetlich zemmehöggle am lagerfüür
, d stilli vo de wüesti gnüsse und de tag entspannt usklinge loh.
Im oasedorf
Keshit hemmer e wiiteri Nacht verbrocht, bevors noch Zahedan gange isch, wo mir d tramper abgsetzt hend und nocher denn z vierte a die pakistanischi
grenze gfahre sind. D usreis usem Iran und au d iireis noch Pakistan hend erstuunlicher- und erfreulicherwiis problemlos und relativ schnell klappet. Mir sind knapp vor fiirobig ade grenze
xi und hend chönne zueluege, wies s grenztor hinter üs gschlosse hend. Ab ezz simmer unter polizeischutz
xi. Denn die region, wo mir hend mösse durchquere, isch es gebiet miteme gwüsse risiko für touriste, dass mer vo de taliban entführt wird. Zur ziit isches jedoch scho viil sicherer wie au scho!
Ide vergangne täg simmer somit täglich mehreri hundert kilometer im konvoi
gfahre – z vorderst immer es militärfahrzüüg mit bewaffnete manne. Übernachtet hemmer jewiils uf de polizeistatione, wo teilwiis zugliich s gfängnis mit insasse xi isch. Die zelle hend jedoch meh us xeh wie tierchäfig…
Mir hend üs ebefalls nöd dörfe frei bewege und sind quasi ständig uf abruef xi. Meistens hemmer jedoch lang eifach mösse warte bis s bürokratische
erledigt xi isch und die nögst eskorte organisiert worde isch, aber wenns los gange isch, denn sofort!
„In Pakistan ist alles anders als zu Hause, vieles anders als das, was wir bisher auf unserer Reise erlebt haben, jedoch die Herzlichkeit der Menschen bleibt!“
D wort und d föteli
langed nöd zum da beschriebe, wa mir do i dem land erlebed und gspüred.
Gest simmer dur e region gfahre, wo no immer heftigst unter de folge vo de extreme überfluetig
liidet. Es chömed so viil gfühl zemme, dass mer mengmol a sini emotionali grenze chunnt
.
Ide stadt Sukkur simmer vo de chind überrennt worde und alli hend wölle föteli mit eim mache – die xehnd selte touriste und no seltener blondschöpf
.
Hüt, noch füf täg, hemmer d autobahn
richtig Lahore erreicht und plötzlich isch d armuet gfühlt relativ wiit weg vo eim. Vorher simmer uf mässig guete strosse unterwegs xi, de verchehr isch „indisch“ wahnsinnig xi, alli mögliche verchehrsteilnehmer vode chueh
, über de velofahrer
, d eselskutsche, s tuktuk
und die riesige, bunte, überladne trucks
, überall liit tonnewiis abfall ume, es stinkt, d flüüge
schwirred in schwärm um eim ume, viil bettler und eifach alles in erbärmlichem zuestand. Uf de drüüspurige autobahn simmer fast ellei, rundume hets viil grüeni felder
und palme – mer merkt nöd, wie arm d lüüt sind und wie hart ihres lebe isch.
Real fact: Pakistan isch 19 mol grösser als d schwiiz und het 225 Millionen iiwohner. D hauptstadt isch Islamabad.
Im summer 2022 sind meh als 33 millione mensche vode extreme überfluetig, wo öppe drüüviertel vom land überschwemmt het, betroffe xi.
In Pakistan herrscht linksverchehr.
In Lahore gönd mir go d visa für Indie
go beaträge und möchted nocher nochli de norde
vo Pakistan bereise. De söll bergig-schön
und chalt si. Viellicht chömed mir döt no es bizzeli in wiehnachts
– oder zumindest winterstimmig
. Momentan isch beides nöd de fall.
Liäbi grüess manuel & ilona
