Vor knapp drü wuche simmer no in Indie🇮🇳 xi, gnauer gseit ide region Kashmir. Und vorgest simmer bereits ide Türkei🇹🇷 aacho. Es sind sehr intensivi und langi täg xi, mit es paar strapaze, schweisstriibende moment aber au sehr tolle begegnige.
Kashmir isch uf üsem weg vo Ladakh zu de Wagha border🛃, aso em grenzübergang zu Pakistan🇵🇰 glege. Do in Kashmir simmer eme spannende typ begegnet, wo au scho ide welt🗺 unterwegs xi isch und ezz i siner heimat chürzlich es unternehme und sozialprojekt gstartet het. Und zwor wird kashmir-wulle🧶 vo hand zu schals🧣 und kleider verarbeitet. D wulle🧶 wird greinigt, gspunne und gwobe und das alles unter eim dach🏠, wo d mitarbeiter zemme schaffed, zmittag essed und gselligkeit gnüssed. Die ungefähr 40 agstellte chömed us umliegende dörfer🏘 und lebed eher i ärmliche verhältnis, hend jedoch die bsundrig fähigkeit vom traditionelle verarbeite vo kashmir🧶. Er het üs zu sim arbetsplatz mitgnoh und üs en iiblick i die verschiedene arbetsschritt geh. Mir hends schön gfunde chönne hinter kulisse dörfe z luege.
Je wiiter abe mir vo de bergwelt⛰️ im indische norde cho sind, desto wärmer und schwüeler ischs wieder worde. Und ab dem ziitpunkt hemmer täglich mehreri hundert kilometer zrugggleit, vom morge früeh bis d sunne wieder untergange🌆 isch. Mir sind richtig froh xi, dass mir uf de hireis scho einiges hend dörfe xeh und erlebe in Pakistan🇵🇰 und Iran🇮🇷, so dass für üs okay xi isch, dass mirs damol quasi nur durchquert hend. Zum gross öppis unterneh wärs üs damol z heiss🥵 xi.
De grenzübertritt noch Pakistan🇵🇰 isch sehr unkompliziert und relativ organisiert verlaufe. Es isch spannend wie viel mir i dere churze ziit vergesse hend und wie viel erinnerige eim plötzlich wieder in sinn chömed, wenn mir ezz die ziemlich gliich strecki wieder gfahre sind. Die letschti etappe dur Belutchistan sind mir wieder vom pakistanische militär👮🏾♂️ eskotiert worde und hend uf de polizeistation übernachted. Damol isch üs sogar es zimmer abote worde, wa mir dankend agnoh hend, denn es het e duschi🚿 und sogar e klimaalag❄️ geh. Obwohl mir de hahn bi de duschi uf chalt igstellt hend, isch nur warms wasser cho – es isch so heiss🌡 die ganz ziit, dass sich s wasser💧 im tank erwärmt und nöd emol am obig abchüehlt.
D strosse🛣 sind würkli in guetem zuestand und trotzdem hets üs churz vor de grenze zum Iran🇮🇷 en hinterreife verjagt – päng!🧨 Zwei bewaffneti manne hend üs de rugge frei ghebet, während mir de reife ide wüesti🏜 bime sandsturm🌪 gwechslet hend – uff. Ezz dörfed mir eifach nöd nomol e reifepanne ha, denn mir hend kein ersatzreife meh.
Obwohl mir die einzige xi sind, wo mitem fahrzüüg🚒 vo Pakistan🇵🇰 noch Iran🇮🇷 hend wölle reise a dem tag, hets duuret. Um üs d warteziit chli agnehmer z gstalte, het üs de pakistanischi polizeichef👮🏾♂️ zum zmittag🍲 iiglade. Oh, da isch richtig lecker xi😋 und en schöne abschluss für Pakistan🇵🇰.
So, de nögsti grenzübergang het klappet und mir hend Iran🇮🇷 erreicht. Üsi priorität isch xi, en ersatzreife z finde. Und da isch gar nöd so eifach xi, wiils üsi reifegrössi so guet wie nöd git i dem land (geschweige denn anderi ersatzteili⚙️🔩). Zum ohni ersatzreife wiiterfahre ischs üs z riskant xi. Also hemmer mösse e lösig finde und en sehr liebe und perfektionistische mechaniker👨🏽🔧 het üs debi gholfe. Während er mitem manuel nomol verschiedensti reifehändler und werkstätt abklapperet het, isch d ilona bim tatütata🚒 ide garage bliibe. Nebst üs isch nomol eine mit sim camper🚐 do xi. Es isch sogar en Iraner xi – da isch eher bsundrig, denn reise im van🚐 kenned sie do sus nöd so. Sie sind eher zelter⛺️. Vor zäh johr het er en hirntumor ergolgriich bekämpft und denn druf abe sis komplette lebe veränderet und isch mit nur eme rucksack🎒 los. Ezz lebt er im camper🚐 und sis „basecamp“ isch bi sine eltere. Mega beiidruckend.
Irgendwenn sind de mechaniker👨🏽🔧 und de Manuel retour cho, jedoch ohni reife. Schlussendli hemmer üs denn entschiede zum en reife druf z tue, wo zwor nöd üsi grössi isch, aber doch ungefähr as auto🚒 passt. So hend mir immerhin öppis für im notfall. Während de reife denn organisiert und parat gmacht worde isch, sind mir is „basecamp“ vo dem iranische camperfründ zum zmittag🍲 iiglade worde😋. Da isch scho e unglaublichi gastfründschaft i dene kulture, dass es so selbstverständlich isch, fremdi lüüt zu sich hei iilade und sie z verköstige.
Gstärkt💪🏽 und mit neuem ersatzreife ischs denn wiiter. Scho am nögste morge het üs jedoch s nögste problem iigholt. S kontrolllämpli💡 „motor“ het plötzlich ufglüüchted und s tatütata🚒 rucklet bim fahre. Wa isch ezz los?! Mir hend e handvoll mechaniker👨🏽🔧 agfahre, wo uf de strecki xi sind und die hend gmeint, dass mir bim letschte mol tanke⛽️ verunreinigte diesel verwütscht hend. Leider hends üs nöd gross chönne helfe, wiils ebe kei ersatzteili🔩⚙️ git für üses fahrzüüg. De dieselfilter isch greinigt worde und sie hend üs gseit, dass es sött möglich sii d türkei🇹🇷 z erreiche, wos wieder ersatzteil git für üs. Die restlich durchfahrt isch sehr agspannt verlaufe – schaffemers/ schaffemers nöd?! Mit de ziit het s tatütata🚒 afange töne wie en traktor🚜, es suuft viel meh als üblich und het so sini problem, wenns e stiiegig git. Bim tanke⛽️ hemmer druf acht geh zum möglichst nur no gueti dieselqualität innezloh. Da isch e zuesätzlichi useforderig xi, wiil im iran🇮🇷 jo eigentlich eh nur d lastwagefahrer🚛 diesel überchömed. Zum glück gits so viel hilfsbereiti mensche, wo üs au unter umständlichste bedinige helfed a üsen triebstoff zcho.
Vorgest hemmer die türkischi🇹🇷 grenze erreicht. S erst mol uf üsere reis hemmer denn am türkische zoll🛃 s ganze fahrzüg mösse leer ruume und es isch alles durchsuecht worde. Zuesätzlich het s tatütata🚒 no mösse gröntgt werde. Es het chli nerve und geduld brucht. Noch numme zwei stund simmer dure xi und hends gschafft.🤗
Ezz stömmer grad am Van See🏞 und bliibed do für es paar täg zum eifach chli dureschnuufe und energie tanke. Nögsti halt wird denn d peugeot-garage🦁 si, wo s tatütata🚒 untersuecht, uf vordermaa brocht wird und verwöhnt söll werde.
Fun fact: D iraner laded eim nöd nur zu sich hei ii. Wenn mer ihne im auto🚗 uf de stross begegnet, wird eim s esse eifach währed em fahre vo fenster zu fenster überreicht. Öb chicken🍗 oder e säckli voll pistazie – wa sie halt grad debi hend.😉
Liäbi grüess manuel & ilona
