S wetter wird zuenehmend winterlicher❄️ und doch hemmer au einigi traumhafti sunnetäg☀️ gha und somit d ziit nöd nur mit bädele ide verschiedene therme vo Ungarn🇭🇺 verbrocht. Öb schwefelbad, moorbad oder höhlebad, mir hend einiges usprobiert🛁.
Vo de region Puszta, wo prägt isch vonere sehr flache landschaft und de lange buurehüüser🏠 mitem typische wasserbrunne devor, isches wiiter is städtli Eger.
S wiibaugebiet🍇 Eger isch im vergangene johrhundert berüehmt worde für ihren rotwii „Erlauer Stierblut“🍷. De und anderi wii🍷🥂 hend mir im Schönfrauen-Tal degustiert. De stadtviertel chamer sich vorstelle, wie es dörfli🏘 bestehend nur us wiinereie – quasi beiz a beiz.
In Ungarn🇭🇺 ghöred mir siit ewigs mol wieder chileglogge🔔 lüüte und genau do, in Eger hend mir d möglichkeit gha s allererst mol es minarett🕌 z bestiege. Irgendwie witzig. Es isch jedoch nümme als gebetsturm in gebruch, sondern ermöglicht de touriste en super blick uf die ganzi stadt.
Nur wegem name simmer is Ilona-Tal🏞, zum Ilona-Wasserfall und hend do e usgiebigi wanderig🥾 gmacht dur de herbstlichi laubwald🍂. Wie a vielne ort im land gits die verschiedenste heilwasserquelle💧, mengmol zum bade und mengmol als trinkwasserbrunne⛲️. Do im Ilona-Tal hets en wasserschacht gha, wo mer miteme chübel s wasser selber het chönne uneufe zieh und sich d fläsche🍶 fülle. Wasser isch nöd gleich wasser, da hemmer gschmeckt und gspürt in Ungarn🇭🇺.
En bsuech ide wunderschöne hauptstadt Budapest hend mir nöd wölle verpasse. E stadt mit sehr prächtige gebäude, prunkvolle thermalbäder und herrlich ade Donau glege. Ime bekannte Restaurant und Café☕️ vo Ungarn🇭🇺, im Gundel, hend mir en palatschinke gnosse. Im prunkvolle, historische saal het bi schummrigem liecht🕯 en pianist🎹 für musikalischi untermolig gsorget und isch spöter vome striicher🎻 quartett abglöst worde. Es ambiente, wie mirs scho länger nümme erlebt hend.
Am chliine Velencei-See und am grössere und bekanntere Plattesee, hend mir Velotoure🚴🏽♂️🚴🏼♀️ unternoh. D veloweg sind super usbaue und usgschilderet. Es isch e beliebti ferieregion bsunders am nordufer🧭 und dementsprechend mit schöne beizli und grosse hotelaalage usgstattet. D sehnsucht♥️ nochem bodesee wird do grad nomol grösser!
En wiitere see isch üsen krönende👑 abschluss vo Ungarn🇭🇺 xi und zwor de thermalsee vo Héviz. Er isch mit sine 4,4 hektare de weltwiit grössti thermalsee und de ältisti im land und mer cha sogar drin bade🏊🏼♀️. Im summer het er e temperatur🌡 vo guet 30°C bis 40°C und im winter doch immerhin no knappi 25°C. Binere ussetemperatur knapp über 0°C im lauwarme wasser schwimme🏊🏼♀️, die frischi luft🌬 iischnuufe und em ufstiegende dunst zueluege isch es bsundrigs erlebnis xi.
Mittlerwiile hend mir Östriich🇦🇹 erreicht, es land, wo wieder dütsch gredet wird. Mengmol chunnts eim fast komisch vor, wenn mer wieder alles verstoht und sich bewusst wird, dass au die iiheimische eim wieder verstönd😁.
Fun fact:
Für die diesjöhrig adventsziit🎄 hend mir üs en gmeinsame adventskalender bastlet, wo mir abwechselnd es „törli“ 🚪dörfed ufmache. Ide erste beide „törli“ hemmer üs gegesiitig söcke🧦 gschenkt. Denn bis ezz uf de reis simmer fast immer barfuess🦶🏾 xi, aber siit es paar wuche hend mir tag und nacht söcke🧦 aa und mengmol sogar zwei pärli. Drum sind söcke🧦 plötzli mangelwar worde😅.
In Östriich🇦🇹 werded mir ebefalls nomol die eint oder de ander reisefründ go bsüechle und üs die letschte täg nochli triibe loh…
Liäbi grüess, e frohi adventsziit🕯 und bis bald, manuel & ilona
