Als ersts zur information a alli, wo besorgt um s Tatütata🚒 sind. Noch zwei täg ide werkstatt, fahrts wieder wie zuvor im xunde zuestand. Somit simmer alli drü wohluf und es goth üs guet.🤗
Die vergangne wuche hemmer im südoste🧭 vo de Türkei🇹🇷, am Van-See🏞 und im Nemrut-Krater🌋 verbrocht. Somit numme öppe 300 kilometer vo de iranische🇮🇷 grenze entfernt. De Nemrut isch en ruhende, jedoch anschiinend no immer aktive vulkan🌋. Es heisst, dass er s letscht mol im johr 1441 usbroche segi – aso doch scho es ziitli her. D landschaft isch traumhaft do, uf rund 2500 meter höchi. Zerst chunnts eim so vor, als würd mer en gwöhnliche berg⛰️ erklimme, aber denn, wenn mer de kraterrand erreicht het und mer im innere vom vulkan🌋 wieder abefahrt, isches scho no es bsundrigs gfühl. Es git ein grosse, dunkelblaue kratersee und mehreri chliini seeli. D vielfalt a mögliche stellplätz isch gross und mir hend üs fast täglich ame neue ort iigrichtet. Bsunders d mörge, wenn d sunne☀️ langsam ufgange isch und die ganz natur🌱 verwachet isch, sind so friedlich und schön xi. Wa s wetter betrifft, hemmer do obe querbeet alles gha. Bi sunnige, summerliche☀️ temperature hend sich usdehnti spaziergäng und en sprung🏊🏼♀️ in chalte kratersee mache loh. Die zwei-drüü täg, wos stürmisch gregnet🌧 het unds ziimli frisch worde isch, hemmer üs warm iipackt🧣, unter decki kuschelet, sogar d heizig mösse laufe loh, tee trunke🍵 und büecher📚 verschlunge. Da isch au mol wieder schön xi. S highlight i dem krater sind jedoch d bäre🐻. Tatsächlich, kum hets dämmeret, hemmer drü bäre am andere seeufer entdeckt. Es isch jedoch nöd lang gange, bis sie in unmittelbarer nöchi gstande sind – da heisst öppe 5 bis 10 meter entfernt. Da isch e ufregends, freudigs gfühl xi!🤗
Im städtli Ahlat am Van-See hemmer en seldschukische, historische friedhof besichtigt. Da isch de drittgrössti türkisch-islamischi friedhof weltwiit und de ältisti ide Türkei🇹🇷. D grabstei usem 12. bis 15. johrhundert zeiged no immer d iischrift und zum teil ebso detailierti muster.
Chürzlich hemmers meer🌊, s mittelmeer, erreicht. Es isch no richtigs badewetter und bi üs herrscht feriestimmig🏖. D Türkei🇹🇷 het üs jo scho ufem hiweg sehr guet gfalle und mir hend üs sehr druf gfreut zum nomol do ane z cho. Nebst de abwechsligsriiche Landschaft, de unglaubliche gastfründschaft und hilfsbereitschaft vo de iiheimische, isch do verhältnismässig alles wieder „eifach“. Tanke⛽️, Trinkwasser nofülle🚰, poste🛒 – halt so alltäglichs, wo mengmol uf üsere reis, gar nöd so selbstverständlich xi isch.
Fun fact:
Normalerwiis seged mir üs, „mach bitte d türe🚪 zue, dass kei mugge🦟 innechömed“. Im Nemrut-Krater🌋 sind d mugge🦟 wortwörtlich die chliiner sach xi, denn do hemmer d türe🚪 mösse zuezieh, dass mir nöd plötzli en bär🐻 ide stube gha hend.
De oktober möchted mir no ide Türkei🇹🇷 verbringe. De momentani, ungefähri plan isch, dass mir denn via Bulgarie🇧🇬, Rumänie🇷🇴, Ungarn🇭🇺, Östriich🇦🇹 zrugg id Schwiiz🇨🇭 chömed.
Liäbi grüess manuel & ilona
