D vorfreud uf s familiestreffe in Istanbul🇹🇷 isch gross und denn au es absoluts highlight xi. Ezz aber vo vorne…
De grenzübertritt bi Batumi in Georgie🇬🇪 id Türkei🇹🇷 wär eigentli unkompliziert xi, wenns nöd vonere sechsspurige uf e einspurigi stross gwechslet hetted bim zoll🛃. De stempel hemmer sehr rasch im pass gha. Bis mir aber dra cho sind und denn effektiv hend chönne iireise sind fast 6 stund vergange.
Innerhalb vonere knappe wuche simmer denn die ca. 1500km am schwarze meer🌊 entlang noch Istanbul🇹🇷 gfahre. D strecki isch nöd unbedingt i dem sinn schön xi, aber d sicht ufs meer natürlich scho. S reise im süde vo de Türkei🇹🇷 het üs uf all fäll viil besser gfalle. Trotzdem hemmer no es paar schöni plätzli entdeckt.
De „Horma canyon“ isch e wunderschöni schlucht. S klima do drin isch relativ füecht, so dass d felse⛰ und bäum🌳 grössteteils mit moos bewachse sind. Dur da, dass au nochli en verwilderete iidruck macht, fühlt mer sich fast wie im dschungel. Ufeme guet und schön gmachte holzsteg chamer 3km bis zume idyllische park🏞 mit wasserfall spaziere.
Ebefalls en schöne spot isch üses „Lost paradise“ xi. Mir hend dem strand🏖 de name geh, wiils do verlasse gwirkt het, jedoch e traumhafti lag am meer mit kitschigem sunneuntergang🌅 xi isch. Paradisisch isches natürli au immer, wenn mir flüssends trinkwasser🚰 und duschene🚿 hend, wa do au de fall xi isch.
Istanbul🇹🇷, die bevölkerigriichsti stadt vo Europa (ca. 18 Mio Iiwohner!), hemmer denn am obig vom 07.10. erreicht. Mit de fähre⛴ über de bosporus simmer vo de asiatische uf die europäischi siite cho. Dur de tunnel, wo under de meerengi dureführt, hend mir weg üsere höchi nöd dure passt. De blick vom schiff us, uf die unvorstellbar riiesig und imposant metropole ide dämmerig, mit millione vo liechter isch gigantisch xi! Mir hend en guete Parkplatz🅿️ gfunde fürs Tatütata, ganz i de nöchi vo de altstadt, de Hagia Sophia🕌 und de Blaue Moschee🕌.
Nochdem mir üs schomol chli umeglueget hend i dem teil vo de stadt, sind es paar täg spöter d eltere👫, die beide brüedere 🧒🏼🧒🏼 und d schwöster👧🏻 vo de Ilona dezue cho – es uu schöns wiedersehen! Mir hends richtig gnosse mit de familie👨👩👧👦; öb s besichtige vo dene viilne, iidrückliche sehenswürdigkeite, s türkische esse🥘🌯 oder eifach s gmüetliche zemmehöggle im appartement unds lustige ha. D ziit vergoth wahnsinnig schnell eso, dass bald scho wieder abschied neh, gheisse het. Währends für d family👨👩👧👦 wieder hei uf Romanshorn🇨🇭 gange isch, werded mir wiiter in oste🧭 reise.
Nebst all dene schöne Sache wo mir hend dörfe erlebe, hemmer üs au no um e chliises aber relevants problem mösse kümmere. D starterbatterie🔋 vom Tatütata🚒 isch langsam dure xi, so dass immer e lotterie xi isch, öb sie aspringt oder nöd. Z fuess hemmer üs uf de weg is „automechaniker-viertel“ gmacht und sind noch öppe 40 minute aacho. Inere werkstatt hemmer churz üsi situation gschilderet. So hilfsbereit & unkompliziert wie die türke sind, so schnell simmer nocher z dritte (Ilona, Manuel, Mechaniker) mitere autobatterie🔋 unterem arm und drüü schruubeschlüssel🔧 ide hand, am strosserand gstande und hend ufes taxi🚖 gwartet. Bim büsli aacho, het de mechaniker üs rasch d batterie🔋 gwechslet – zagzag und es funktioniert wieder riibigslos. Wa für e erliechterig!
Fun fact 1: wüssed ihr wo sich s grösste haselnussabaugebiet vo de welt🌍 befindet? – genau, a de schwarzmeerküste ide türkei🇹🇷, wo mir grad xi sind. Und wüssed ihr wa us haselnüss hergstellt wird? – richtig, nutella. Wiil mir üs gern mit regionale produkt verköstiged, hets die letschte täg en huufe… – volltreffer, nutella (respektiv de weniger bekannt lokali haselnussufstrich) geh!😋
Ost – west – ost; mittlerwiile hemmer Istanbul scho wieder de rugge gchehrt. Ende oktober🗓, aso scho bald, isch plant zum in Iran🇮🇷 iizreise…
Liäbi grüess manuel & ilona
