Vo sandstrand🏖 zu chieselstrand🏖 und vo bucht zu bucht hend mir üs de küste entlang richtig weste🧭 tastet. Schwimme, plantsche und sünnele😎 isch üses haupttagesprogramm xi. Am ufer entlang hend mir zudem usdehnti spaziergäng unternoh. Denn echli bewegig schadet üs nöd😉. Zum znacht hend mir grilliert🔥 und bi cherzeschii🕯unterem sternehimmel⭐️ gesse.
Wa natürli bime ufenthalt ide türkei🇹🇷 nöd dörf fehle, isch en bsuech ime hamam oder au als „türkischs bad“🛁 bekannt. Dodebi goths nöd nur drum zum sich reinige, sondern söll sich und am körper öppis guets tue. Üses paket het e schuumpeeling🧼 beinhaltet, wo mir zerst schö suuber gschrubbt worde sind. Denn isch e reinigendi gsichtsmaske gfolgt und de krönendi abschluss isch e ganzkörper-entspannigs massage💆🏽♂️💆🏼♀️ mit heisse stei xi. Da isch wellness🌸 pur xi!
Mir hend aber au nochli gschaffet und nöd nur gwellnesset😇. Während üser reis hend mir es paar wenigi sache festgstellt, wo mir im Tatütata🚒 gern andersch respektive ergänzt hetted. Mir sind selber verwunderet, dass mirs sus im grosse und ganze eigentli genau so usbaue hend, wies praktisch und schön für üs isch. Obwohl da üsen erste büsliumbau🚐 xi isch und mir beidi kei handwerker👨🏽🔧 sind. Vor üser abreis hend mir zwor dra denkt und drüber nodenkt, üs aber nöd getraut für de schritt. Ezz simmer üs sicher xi, dass mir da möchted und hend e dachlucke mit deckiventilator🌬 installiert. De heikli punkt isch halt, dass mer es loch🕳 is dach säget😵💫. Ide nöchi vo Antalya hemmer e fachkundigi werkstatt gfunde, wo üs debi gholfe het und i füf stund isch die sach erledigt xi💪🏽. Au wenns ezz nümme ganz so heisses🌡 wetter isch, so hemmer doch eifach die viel agnehmer und frischer luft🌬 i üsem „wöhnigli“.
Es isch üs ezz au zum erste mol in sinn cho, dass mir üsi holzmöbel🪑 und dachterrasse chönnted öle zums pflege. Gedacht – getan. Mir sind mega überrascht xi, wie neu✨️ und frisch de tisch und d arbetsplatte plötzli wieder usxehnd.
Noch de fahrt über de bospurus🌉 in Istanbul, hend mir ezz wieder europäische bode under de räder. Do in Istanbul hend mir üs für es paar täg es airbnb zimmer gmietet ime gässli, wo sus nur iiheimischi wohned. Die stadt büütet so viel unterschiedlichi egge und winkel, dass immer wieder neus z entdecke git. Dass do au so en huufe chatze🐈⬛🐈lebed, isch üs letscht mol nöd so extrem ufgfalle und damol sinds en ständige und permanente begleiter. Nöd nur uf de strosse, au ide restaurants und i de läde – überall chatze🐈🐈⬛. Am sunntig📆 isch im quartiert amigs en lokale bazar mit frischem gmües🍅, frücht🍉, fisch🐟 und kleider👗. Mir sind durd marktständ gschlendert und sind iitaucht i das handle und triebe. I üsem gässli sinds i jedem cheller am muschle🐚 reinige. Riesigi säck voll muschle🐚 werded putzt, ussortiert und für de verchauf parat gmacht.
Fun fact:
Üsen beste und beliebtiste mitarbeiter i üsem airbnb zimmer isch zur ziit grad d wöschmaschine, wo so guet wie ununterbroche lauft. 10 maschine wösch sind scho dure – aber es isch au nur e chliini wöschtrommle🤷🏼♀️. Endli mol wieder d bettwösch, chüssibezüg, vorhäng und alli andere stöff richtig wäsche🧺.
Bald goths noch Bulgarie🇧🇬, wo mir zu eim hei🏡 iiglade worde sind. Ihn hend mir letscht johr ide Türkei🇹🇷 troffe und kenne glernt. Er het mitübercho, dass mir ezz ufem heiweg sind und üs iiglade unbedingt bi ihm verbi z cho. Mir freued üs uf das wiedersehe!🤗
Liäbi grüess manuel & ilona
