Über de Kanal vo Korinth, wo ä Längi vo 6343 meter und e tüüfi vo bis zu 84 meter het, hemmer wieder s griechische festland🇬🇷 erreicht.
Nochere lange autofahrt simmer am Yliki-See aacho. En ort, wo nonig entdeckt worde isch, oder bereits in vergesseheit grote isch – uf all fäll wunderschön, ruhig und ganz ellei. De manuel het de tag dure ganglet🎣. Zum znacht hets denn aber doch pasta mit pesto geh😉
Uf de halbinsle Chalkidiki, wo d form vo „3 finger“ het, hemmer de mittleri🖕🏼 (Sithonia) devo bereist. S ziil isch die südlichi spitze xi, wo mir e tolli sicht ufd Ägäis und de Athos (Berg ⛰und östlichi Finger, wo e Mönchsrepublik lebt und für Touriste nöd zuegänglich isch) erwartet hend. Aacho simmer ime dörfli ohni hüüser, nur mit strosse und stege. Wie mir in erfahrig brocht hend, isch das do es ehemoligs, misslungnes immobilieprojekt mit 3000 plante hüüser🏘. Das ganze het en bsundrige charme und fast echli öppis vonere geisterstadt. Mit 4×4 hemmer en geniale platz aagfahre, wo mir en herrliche sunneufgang 🌄mit blick uf de Athos und s meer erlebt hend.
Am 06.08.22 isch üsen 13. grenzübergang🛃 bevorgstande – Bulgarien🇧🇬. Üsen erste halt i dem Balkanstaat ischs imposante Rilachloster⛪ xi. Da ischs grösste Chloster vom Land und ghört zum UNESCO- Welterbe.
Im Rila-Gebirge⛰ ischs denn sportlich wiitergange mit de 7-Seen- wanderig. Am morge hemmer üs siit meh als 70 täg wieder mol de wecker⏰ gstellt, damit mir möglichst die erste dobe sind. Es isch nämlich es sehr beliebts reiseziil. Bi frische temperature🌬 hemmer ufem berg de zmorge und d landschaft gnosse.
Wiiter ischs id Rhodope ⛰is dörfli Yagodina gange. Eimol meh isches e abedtürlichi fahrt xi mit überhängende felse und schmale strosse. Vo de rossweid🐎 us, wo mir üs platziert hend, hemmer am nögste tag e 7stündigi wanderig unternoh. Zerst hets en aastieg zum „Eagle eye“ geh. Eigentli isch da nur en balkon, womer e sicht is tal het, wie en adler🦅. Üsen fuessmarsch isch wiiter zum „Devil’s throat“. Zu dere riesige höhli gits en huufe sage, gschichte und theorie, wie de tüüfel😈 do söll huuse. De fluss „verschwindet“ do ide schlucht nämli ufe bis hüt unerklärlichi art&wiis.
Bim recherchiere für Bulgarie🇧🇬 hemmer entdeckt, dass es irgendwo in zentralbulgarie es ufo-ähnlichs 🛸gebäude söll geh. Da hemmer mit üsne eigne auge wölle xeh. Nördlich vo Kazanlak hemmers gfunde – s Busludscha Denkmol. Da isch es kongressgebäude xi und isch siit 1989 sich selber überloh.
Au wenn d rosesaison 🌹scho längst verbii isch, hemmer unbedingt no is rosetal und uf Kazanlak (Stadt der Rosen) wölle. Schliesslich isch das de usschlaggebenidi punkt für üses startdatum xi.
Fun fact 1: s brucht halt doch richtige schwiizerchäs🇨🇭 für es echts fondue🫕. Üses 1.August fondue in Griecheland isch leider nünnt worde – es het denn brot, wurst & chäs 🧀 und en griechische salot🥗 geh.
Fun fact 2: mir hend üs vorgnoh, wenn das mitem repariere vo de dachterrasse verhebet, dass mir denn öppert anderem öppis guets wönd tue. So hemmer ezz 4kg hundefuetter bi üs für die streunende hünd🐕.
Die bulgarisch autovignette isch no zwei täg gültig. Drum simmer ezz bereits ganz im oste vom land, am Schwarze Meer 🌊und mached üs demnächst uf id Türkei🇹🇷.
Liäbi grüess manuel & ilona
