Die letschte zwei wuche hemmer würkli wieder en huufe tolli sache dörfe erlebe. Nebst total nette neue bekanntschafte👨👩👧 und leckerem georgischem esse, hemmer einiges vo de landschaft und kultur xeh.
Ufem weg noch Stepanzminda sind d lastwäge🚛🚚🚛🚚 rund 100 kilometer lang gstande und das mehreri täg oder sogar wuchene?! Do isch nämli de einzigi grenzübergang noch Russland🇷🇺. Üs hend d lastwagefahrer richtig leid tue. De stau am Gotthard ide Schwiiz isch en klacks degege! Mir hend do ide region trotzdem es paar schöni täg verbrocht. De spaziergang zu de drüüfaltigkeitschile⛪ isch zwor leider chli enttüschend xi, wiils sehr touristisch gmacht xi isch. Defür isch d wanderig im Truso-Tal🌄⛰ und de naturmineralpool am stellplatz umso schöner xi. De schwumm im chalte blötterli-wasser nochem wandere isch erfrischend guet xi.
Ezz simmer scho es ziitli ide länder vo de ehemolige sowjetunion unterwegs und es het üs drum au chli aafange interessiere, wa do de gschichtlichi hintergrund isch. De bsuech im Stalin-Museum het somit zum programm ghört. Es befindet sich in Gori, im Geburtsort vom ehemolige ministerpräsident vo de sowjetunion. Sehr es prunkvolls Gebäude mitere iidrückliche Usstellig. Zum glück hemmer üs am Vortag schochli informiert, denn d „füehrer“ (guides) sind alli scho usbuechet xi.
Uf üsere wiiterfahrt simmer durd „Seilbahnstadt“🚡 Tschiatura cho, wo bis zum erste Weltchrieg s grössti Manganerzbergbauzentrum vo de welt🗺 xi isch. Es wichtigs öffentlichs transportmittel sind d seilbahne xi, wo d wohnquartier ade talhäng⛰ mitem tal verbunde hend. Au hüt no hets einige seilbahne, so dass mer statt mitem liniebus🚍, mit de seilbahn🚡 is zentrum goth. So sind au mir, wie die iiheimische, mit de gondle is städtli gfahre und das für umgrechnet 15 rappe. Und hend de prunk vo de stadt us vergangener ziit erahne chönne.
Mengmol nehmed mir üs fast z viil vor, so dass mir ab und zue ganz bewusst en tag zum entspanne iilegged. So hemmers zum biispiel au anere natürliche, heisse schwefelquelle irgendwo im nirgendwo gmacht: 15 minute bädele, denn e stund pause und das drüü mol. Nochher hemmer zwor ziimli starch groche🦨, aber hend üs richtig guet gfühlt.
Wenn mirs grad scho vom wellnesse hend; s Zqaltubo isch de bedütensti kurort ide sowjetunion xi. Mittlerwiile sind diä einst glamouröse✨ sanatorie aber meh ruine und lost places – schatten ihrer selbst. Zum go erkunde jedoch immer no wahnsinnig spannend!
Per zuefall hets ide nöchi au grad no e winery🍷 geh. Georgie🇬🇪 isch eis vo de ursprungsländer vom wiibau und de kultivierte wiirebe🍇. A die winery wo mir anecho sind, isch nöd irgend eini xi, sondern s ehemolige wohnhuus vom do bekannte schriftsteller Otia Ioseliani. Sini büecher📚 sind i 17 sproche übersetzt worde. Sin sohn und enkel füehred d winery und hend üs d rüümlichkeite mit stolz zeiget. Bim philosophiere isch de gastgeber uf de punkt cho, dass mir alli e mission hend. Da isch für üs s zeiche xi zum wiitergoh.
S nögste ziil isch Mestia xi, wo mir dank no em trochne wetter relativ guet erreicht hend. D strosse sind mittlerwiile nöd emol so schlecht usbaue, aber felsstürz und hangrütsch sind halt kei selteheit. Au mir sind eimol grad anen felshuufe anegfahre, wo chürzlich devor abecho isch. Alli wo neu dezue cho sind, hend gholfe bim stei uf d siite schiebe, so dass d wiiterfahrt mögli xi isch. Am gliiche obig no hets aafange regne🌧 und meh oder weniger zwei täg duregseichet. Zerst hemmers no gnosse – endli mol mit guetem gwüsse so en richtig gmüetliche stubetag mit tee🍵, lese📖, spieli🎲🃏 spiele, musige und eifach fuulenze (nur de kaffi mit schuss het gfehlt). Bald aber scho het sich au e trägheit und langwiili breit gmacht, so dass mir e richtigi vorfreud gha hend uf üses nögste abedtüür.
Am sunntigmorge früeh ischs immer nochli wolkeverhange☁️ xi, aber mir hend trotzdem üsi wanderschueh🥾 & thermounterwösch aagleit, de ruggsack🎒 buggled und sind am 7:15h losmarschiert. I zwei täg hemmer vo Mestia noch Ushguli wölle wandere. Da sind total öppe 55km und pro tag guet 1000 höhemeter zum bewältige. Anschiinend ghört diä strecki zu de beliebtiste wanderweg vom ganze land. Mir sind zu de jetzige johresziit aber die erste stunde tutsch niemmertem begegnet. Traumhafti, herbstlichi🍂🍁 landschaft und schneebedeckti gipfel🏔 für üs ganz ellei! Im guest house in Adishi, üsem erste tagesziil, simmer kulinarisch verwöhnt worde vo luuter huusgmachte spezialitäte. Richtig lecker!😋 Es isch üsi erst nacht „uswärts“ xi siit reisebeginn – aso s erst mol nöd im Tatütata gschloofe. Am nögste morge isch d sunne☀️ scho do xi, wo mir los sind und het üs de ganz tag begleitet, nomol en wunderbare tag. Die letschte 7 kilometer bis uf Ushguli sind denn gliich nochli zäch worde, mir hends aber gschafft!
Fun fact: in Ushguli isch vor es paar johr de film „Dede“ dreiht worde und sie hend do sogar es chliises kino📽 iigrichtet (wohrschiinli ischs früehner en chuehstall xi). So sind mir am mittag am 13:00h s zweite i dem cheller ghogget und hend üs de lokali film🎞 aglueget. Zwüschetdure hets mol no churz en stromusfall geh und es müüsli🐭 isch verbii ghuscht.
Vo de berge🏔 as meer🌊- gest hemmer d schwarzmeerküste bi de hafestadt Poti, im weste vo Georgie🇬🇪, erreicht. Do fangt ezz quasi üsen küsteweg uf Istanbul🇹🇷 aa.
Liäbi grüess manuel & ilona
