De grenzübertritt in Iran🇮🇷 het sowiit problemlos und entspannt klappet, dank üsem Fixer. Mit gehupe und zuewinke👋🏼 werded mir uf de stross grüesst. Bim becker isch üs scho zwei mol s brot🥯🍞 vo iiheimische zahlt worde, miteme breite lächle und eme „welcome to iran“. Bim ane mautstell anefahre, werded mir ebefalls oft freudig begrüesst und hie & da bestönds sogar druf, dass mir ohni zahle wiiterfahred.
S aacho i dem land🇮🇷 het aber trotzdem duuret und es isch au ezz für üs immer no viiles umständlicher und komplizierter als die bisherige länder. S reise ime so fremde land isch zwor sehr spannend und iidrücklich, gliichziitig aber au aastrengend und ermüedend. Ganz banali alltagssituatione werded plötzlich zunere fast tägliche useforderig.
Im Iran🇮🇷 ischs eigentli nöd möglich zum dini eigeni internationali kreditcharte💳 chönne z nutze. So hemmer Dollars💵 gwechslet, damit mir iranischs Bargeld gha hend. Für 100$ gits ungefähr 30’000’000 (30 millionen)Rials! D priise sind oft aber in Toman aageh (da isch die gliich währig, eifach miteme 0 weniger…). Meistens jedoch lönds au do die letschte drü 0 weg, so dass z.B. wenn 50T (Toman) aagschriebe isch, 50’000Toman gmeint sind und das wiederum 500’000 Rials entspreched. Chömeder drus?🤔
E wiiters thema ischs diesel tanke⛽. Da chasch do nur mitere entsprechende tankcharte, wo aber meh oder weniger nur lastwagefahrer🚚 hend und überchömed. Normali PW’s und Camper chömed so direkt theoretisch gar kei diesel über. Bim aafahre vonere tankstell⛽ lueged mir so immer, dass lastwäge🚚 ume sind und die üs über ihri tankcharte chönd es paar liter abgeh.
Zuesätzlich zu dem, dass es eh scho schwierig isch zum tanke, sind do distanze unglaublich viil wiiter als in Europa. Also es isch viil meh vorus luege und plane, agseit. D flächi vom Iran🇮🇷 isch nämli guet 40x so gross wie vo de schwiiz🇨🇭.
Denn gits no es paar wiiteri sache, wos z beachte gilt; wuchenend isch do am donnstig & friitig, velo🚲 fahre isch für fraue verbote respektive giltet als unsittlich, ezz sinds nebst de buechstabe🔤 au no zahle🔢 wo andersch sind und de google übersetzer isch nümme gliich talentiert wie bi de bisherige sproche. Da und no viiles meh isch andersch. D bekleidigsvorschrift🧕🏼 isch numme no en chliine teil und fallt fast nöd is gwicht – es git so en huufe anderi sache, wo viil relevanter sind.
Trotz dem, dass mir vor allem viil am plane und organisiere sind und gfühlt viil weniger unternehmed als au scho, hemmer scho so viil erlebt und die verschiedenste iidrück gsammlet.
Üsi erst besichtigung isch d „ali sadr cave“ xi. Da isch e riesigi tropfsteihöhli, wo mer ufgrund vo dem viile und tüüfe wasser, mit böötli🛶 erkundigt.
Ide erste täg simmer inere ehemolige karawanserei xi, wo zur ziit vome grüppli freiwillige unterhalte wird. Döt wo früehner d kamel🐫 und ihri war unterbrocht worde sind, gits hüt übernachtigsplätz, es chliises café☕ und en shop, wos lokali kunst zum iichaufe aabüted. Ebeso haltets karawanserei in schuss, dass sie nöd in sich zemme fallt und mached füehrige dur das bauwerk. Mir sind sofort sehr herzlich empfange worde und hend do ebefalls nomol es schwiizer🇨🇭 pärli troffe. S gmüetliche beisammensein isch bis am obig spoth wiiter gange. Unter anderem hemmer au „Brändi Dog“ gspielt. Vom feeling her, hets irgendwo sus uf de welt🌍 chönne sii… fründe unter sich…
D landschaft isch wunderschön, au wenns viil wüesti🏜 het. Us de ferni hemmer sogar scho wildi kamel🐫 xeh. Dank de aagnehme temperatur ischs richtig schön zum am tag dure aktiv si und z nacht guet chönne schloofe.
In Isfahan hemmer üs mit de Livia & em Dominic verabredet, dem schwiizer🇨🇭 pärli wo mir in Armenie🇦🇲 kenne glernt hend. Isch e tolli ziit xi mit dene beide und s het au guet tue, sich chönne usztusche.
Für morn stoth e privati Stadtfüehrig dur Isfahan ufem Programm. Mir freued üs die prunkvolle gebäude🕌 vo inne chönne go besichtige und öppis über d gschicht dörfe z erfahre.
Fun fact: die erste paar mol hemmer zu wucherpriise tankt⛽, vo umgrechnet 0,33€/liter. S letscht mol isch üs de regulär priis vo umgrechnet 0,01€/liter verrechnet worde.
S visum für Pakistan🇵🇰 hemmer bereits beatreit und hoffed uf baldigi bestätigung. Planet isch, dass mir afangs Dezember noch Pakistan iireise werded.
Liäbi grüess manuel & ilona
