Uf üsem rückflug✈️ vo Brisbane🇦🇺 noch Kathmandu🇳🇵 hemmer en elfstündige zwüschestopp in Sydney🇦🇺 gha. Da het sich grad guet verbinde loh mitere besichtigung vode harbour bridge🌉 und em berüehmte opera house, s wohrzeiche vo Sydney🇦🇺. Es isch jedoch nacht🌃 xi und viil los isch nümme xi. Mir hend d ziit doch irgendwie dure brocht und sind am nögste morge via Kuala Lumpur🇲🇾 wiiter. Leider hemmer do üsen aschlussflug✈️ verpasst und sind ide hauptstadt vo Malaysia🇲🇾 gstrandet. Es isch ebefalls wieder nacht🌃 xi und bis zum nögste flug✈️ noch Kathmandu🇳🇵 hets no es paar stündli duuret. So hend mir üs es taxi🚖 gno und sind zu de Petronas Zwillingstürm gfahre. Da isch es wolkechratzerpaar🏙 us glas und stahl, wo s moderne stadtbild prägd und en huufe touriste aalocked. Mir hend es paar fotene📸 gschosse und hend üs zrugg zum flughafe chauffiere loh. Endlich sitzed mir im flugzüg✈️ noch Kathmandu🇳🇵. Mir sind so müed, dass mir grad iigschloofe😴 sind und beidi nöd gmerkt hend, wie de flüüger abghobe🛫 isch. Schliesslich simmer au scho um die 48 stunde uf de bei xi. Mir hend üs Nepal🇳🇵 gnöcheret. Vo obe het mer satte grüen vo de wälder🌳 und riisfelder🌱 xeh und au die farbige hüüser🏘. Denn, endli simmer glandet und zrugg bi üsem Tatütata🚒 xi. Es isch tipptopp zwäg xi und mir hend üs als ersts grad i üses vertraute und bequeme bett🛏 gworfe.
Vo Kathmandu🇳🇵 hemmer bis ezz nonig viil xeh und das drum nogholt. Im zentrum vo de altstadt, im gassegwirr, befindet sich de Durbar-Platz. Er isch eine vo de drü königliche👑 plätz xi und vo über 50 pagode, tempel🛕 und paläst umgeh xi. Es erdbebe im johr 2015 het jedoch einiges zerstört und sie sind no immer mitem wiederufbau🏗 beschäftigt.
Ide vergangne täg simmer ide Mount Everest🏔 region xi. Miteme local bus🚌 sind mir zume bergdörfli glangt, vo wo us mir en füftägige trek, de Pikey Peak Trek, unternoh hend. Anschiinend söll da eini vo de beste wanderige🥾 sii, wenn mer de Mount Everest🏔 möchti xeh. Momentan isch do d monsunziit und es regnet🌧 viil, da hemmer gwüsst. Und so hemmer üsen rucksack🎒 mit de entsprechende regeusrüstig☂️ packt. Dass jedoch au praktisch immer neblig🌫 xi isch, hend mir nöd erwartet. Ab und zue, vor allem am morge, hets es bizzeli uftue, mer het fleckewiis de blaui himmel gseh und d sunne🌥het churz hallo gseit. Sehr schnell aber sind denn d wolke wieder cho und es isch grau🌫 xi. So het sich üs de höchsti berg vo de welt, de Mount Everest🏔, leider nöd wölle zeige. Au alli restliche berge sind hinderem nebel versteckt xi. De wanderweg an und für sich isch schön xi und het dur viil grüen🌱 gführt. D bewegig ade frische luft hend mir au sehr gnosse und het üs guet tue.
Zrugg im nepalesische flachland erschloth üs d hitz🌡 fast. Es het guet 30°C, hochi luftfüechtigkeit und isch praktisch windstill. Drum lueged mir, dass mir täglich viil kilometer chönd fahre🚒 und i chüehleri regione chömed.
Fun fact:
Mitem local bus🚌 fahre isch immer es abentür. Es het gheisse, dass de bus am 8i bi üsem standort📍 verbi chunnt. Natürli sind mir pünktlich parat gstande. Vom bus🚌 het jedi spur gfehlt. Am 11i hemmer no immer ufen gwartet, aber schliesslich ischer cho. Statt dasses grad wiiter isch, hets zerst e Zmittagpause🍛 geh. Öppe e halbstund spöter simmer denn endlich unterwegs xi.
Geisse🐐 sind kei ufem dach mitgfahre und hüehner🐓 het au niemmert underem arm debi gha, wa sus eigentli oft de fall isch.
Plötzli simmer stoh bliibe – panne. Es paar manne hend do und döt umeschrübelet🔧, noch de ursach gsuecht und irgend es stuck schluuch isch provisorisch ersetzt worde. Es het ziimli nochere bastlerei usxeh.🙈 Aber de bus🚌 isch wieder gfahre und d bremse hend au (wieder) funktioniert.
Morn werded mir d grenze noch Indie🇮🇳 überquere und so schnell wie mögli id bergregion Ladakh fahre. Do möchted mir die heisse täg🥵 überbrücke, bevors denn zügig dur Pakistan🇵🇰 und Iran🇮🇷 zrugg noch Europa🇪🇺 söll goh. Jo, somit chamer sege, dass mir üs ufem heiweg befinded. Üsi rückkehr wird absehbar. Es fühlt sich guet & richtig aa zum ezz chehre und mir freued üs druf.🤗
Liäbi grüess manuel & ilona
