Nöd nur mir hend üs üsen traum verwürklicht. Am spanische🇪🇸 iiwanderer José Paronella sin traum ischs xi, es schloss🏰 z baue. De traum het er sich verwürklicht im johr 1935 mit de eröffnig vonere grosse parkalag⛲ – em Paronella Park. Nochdem dass es für es paar johr gschlosse und sich selber überloh worde isch, ischs siit de 90er wieder i guete händ👐🏼 und de paronella traum lebt wiiter. Es isch würkli es träumli das spanische schloss🏰 am wasserfall, miteme tunnel wo zume gheime garte⛲ führt und enere riesige parkanlage🏞.
Für üs isches nocher via Port Douglas zum Cape Tribulation im Daintree Nationalpark wiiter gange. Do treffed zwei superlative ufenand, nämli ein vo de ältiste regewälder🌳 vo de welt und s grösste riff, s Great Barrier Reef. Beides sind lebesrüüm vonere vielfalt und vielzahl a lebeswese. En bsundrige vogel isch de Cassowary. Er het d grössi und s ussehe vome vogelstrauss, jedoch en blaue chopf und es horn obedruf – fast chli wie en dinosauriervogel🦕. Es het üs nöd gwunderet, wenn mir i dem alte und dichte regewald no uf anderi urtier🦖 gstosse wäred😉
Die nördlichsti stadt ade australische ostküste isch Cooktown. D fahrt döt ane übers innland, durchs „nichts“, het eim schomol gspüre loh, wie wiit weg vo allem das städtli mit sim eigene charme liit. Vome hügel⛰ in Cooktown het mer e 360° ussicht uf d region gha und isch sich bewusst worde, dass mer am ar… vo de welt isch; s blau vom ozean🌊 und s grüen vo de wälder🌳 sowiit mer luege cha!
Öppis, wa mir no hend wölle erlebe am Great Barrier Reef isch tauche🤿. Vo Cairns us simmer miteme schiff🛥 use ufs riff. Es isch de ilona ihren allererste tauchgang xi und het sie schochli überwindig gkostet. D abhängigkeit und s vertraue i die luftgfüllti taucherfläsche hend am meiste müeh gmacht. Die kommende paar tauchgäng sind immer besser und entspannter abgloffe, so dass mer das einzigartige gfühl vo „im wasser schwebe“ het chönne gnüsse. Zudem isch natürli au d unterwasserwelt do wahnsinnig schön xi. Nebst de vielne verschiedene koralle und bunte fisch🐠 hemmer au meeresschildchrote🐢, en roche und riffhaie🦈 us de nöchi chönne beobachte. S schwimme ime schwarm grosser (üs unbekannte) fisch🐋 isch ebefalls sehr iidrücklich xi. D nacht ufem schiff, dusse ufem meer z verbringe het s ganze abgrundet und zume unvergessliche erlebnis gmacht!
Wieder zrugg an land goths is outback. Im Undara Volcanic🌋 Nationalpark hemmer e wanderig dur die trochni, steppeartigi landschaft🏜 gmacht und en spaziergang uf eim vo dene vulkankrater.
Fun fact: „Tim Tams“ sind DIÄ biskuits🍪 in Australie und gits mittlerwiile i über 10 verschiedene sorte. Mir hend üs ezz denn scho bald dur alli gschmäcker dureprobiert😋 und finded die originale no immer die beste.
Right now simmer ufem „great inland way“ scho wieder richtig süde🧭 unterwegs. Die wiiti isch unvorstellbar. Vo de eine stadt🏙 bis zu de nöchste fahrt mer mindestens 300 bis 400 kilometer. Aso öppe wie vo Romanshorn uf Genf. Und denn sind do no die sogenannte road trains – lastwäge🚛 mit 3 bis 4 ahänger. Do herrscht es komplett anders lebe, als de küste entlang.
Liäbi grüess manuel & ilona
