Vo Pokhara us hend mir Kathmandu noch 3 täg und en huufe staubige stunde erreicht. Es wird nämli die ganz 200 kilometer langi stross🛣 erneueret und isch zur ziit e einzigi baustell🏗.
De landweg wiiter richtig oste🧭 wird zuenehmend schwieriger, tüürer und isch mit hochem bürokratische ufwand verbunde. So simmer froh xi, dass mir do ide hauptstadt vo Nepal🇳🇵 en guete stellplatz gfunde hend. Für üs sogar so optimal, dass mir ziimli spontan en flug✈️ noch Australie🇦🇺 buechet hend. Nepal🇳🇵 isch somit uf e art zu üsem wendepunkt worde. Wiil sich alles grad plötzli so passend ergeh het, hemmer üs vorübergehend vom Tatütata🚒 verabschiedet und sind am 13. Mai churz vor mitternacht (ortsziit), mit nur eme chliine ruggsack🎒 bepackt, in Brisbane glandet🛬. Nöd nur mir zwei sind so flexibel xi, au mini tante d Ingrid und ihren maa de Brian sind choge spontan xi. Sie hend üs vom flughafe abgholt, üs wahnsinnig herzlich es zimmer🛏 grichtet und üs mit ihrer gastfründschaft verwöhnt. E gueti wuche hemmer ezz bi ihne dörfe wohne, bis üs wieder richtig glustet het zum wiiterzieh. I dene täg bi de Ingrid und em Brian hemmer es paar tagesusflüg unternoh; e gführti stadttour dur Brisbane, en bsuech inere koala-ufzuchtstation🐨 und en spaziergang am pazifik, de Gold coast🌊 entlang.
Ebefalls hemmer üsen road trip planet und sind au do wieder sehr unterstützt worde mit auto🚗, zelt⛺, campingusrüstig und rotschläg. A dere stell e riesigs dankeschön a eu – Ingrid und Brian!🙏🏼
Bim grossonkel Albert und siner Frau Rose hemmer ebefalls en churze bsuech gmacht. Er isch vor jahre au mol sehr viel greist🗺 und mir hend gegesiitig üsi erlebnis und erfahrige bime gmüetliche zemmehöggle, chönne ustusche.
Am mentig isch es los gange. Mir sind uf üsen road trip vo Brisbane, de ostküste entlang in richtig Cairns. Im hinterland vo de Sunshine coast simmer ade „glasshouse mountains“⛰ vorbii. Die felsformatione raged spektakulär empor, idere ansonste flache ebeni.
Bim spaziergang dur de tropischi Kondalilla nationalpark isch üs s erste wild lebendi wallaby🦘 über de weg ghüpft. Au en waran🦎 und es oppossum hemmer bereits xeh.
D stränd🏖 wo mir bis ezz xi sind, sind riesigi sandstränd, s wasser wunderschön blau und klar. De surfer🏄🏽♂️ zueluege, die unglaublichi wiiti gnüsse und die farbintensive sunneuntergäng🌅 bewundere ghöred zum tagesprogramm. Obwohl do grad de winter afangt, hemmer de tagüber doch no gueti 20°C🌡.
Wa d umstellig vom läbä im büsli🚒 zum schloofe im zelt🏕 betrifft, simmer nochli ide gwöhnigs-phase😉
Real fact Australie🇦🇺:
-Australie het meh als 10’000 stränd🏖; wenn mer jede tag ein strand bsueche würd, brücht mer 27 johr
-wiil Australie ufem globus „unne“⬇️ isch, heissts au „down under“
-s wort „Koala“🐨 chunnt vo de Aboriginies und bedüted soviel wie „trinkt nicht“, denn die tier nehmed de grössti teil vo ihrem wasserbedarf überd eukalyptusblätter uf
-s giftigste tier vo de welt lebt in Australie; e qualleart mitem name seewespe🐝
Ezz simmer grad ide Region Noosa am Meer🌊, tanked sunne☀️ und sammled üsi erste campingplatz erfahrige.
Liäbi grüess manuel und ilona
