Vor es paar täg simmer zrugg uf Pokhara cho. Die stadt hemmer knappi zwei wuche zuvor im morgegraue miteme touristebus🚌 verloh, um üses erste grosse wanderabendtür im Himalaya🏔 z erlebe. Bepackt mit üsne wanderucksäck🎒 hend mir schlofsack, thermowösch, wullechappe, stirnlampe🔦 und blasepflaster🩹 für alli fäll mit üs treit. Mir hend üs an „Annapurna circuit“ gwoget, eini vo de abwechsligsriichste und vielsiitigste trekkingroute in Nepal🇳🇵 wo mer bis zu 21 täg chan unterwegs si. Er umrundet s massiv im zuge vo rund 230km und mer leit ungefähr 23’100 höhemeter zrugg. Üsen Startpunkt isch s dörfli Chame uf 2670m xi, weles nur no miteme offroadfahrzüüg erreichbar isch und nümme mitem bus🚌.
Am nögste morge simmer frisch-fröhlich und munter losmarschiert🥾. D sunne☀️ het gschiint und i de ferni hemmer bereits die schneebedeckte gipfel🏔 xeh. Üsi unterkunft hemmer viil früehner als erwartet, erreicht. Da isch üs aber grad recht xi, denn im früehne nomi sind wolke☁️ ufzoge und es het richtig fest aafange schneie🌨.
Zu dem ziitpunkt sind mir längst ide guete stube, am warme holzofe🔥 ghogget, hend tee🍵 trunke und s chartespiel „skyjo“ gspielt.
De kommendi tag hemmer somit ime strahlende winterwunderland gstartet. Friedlichi stilli und glänzend-glitzernde schnee❄ hend üs erwartet.
Nocheme steilere und echli astrengende aastieg simmer miteme traumhafte panorama ufd gipfel🏔 vom Annapurna II mit 7937m, Annapurna III mit 7555m und Annapurna IV mit 7525m, belohnt worde. Wiiter isches ebener, hie und da het mer en fluss überquert und isch immer mol wieder a buddhistische☸ gebetsfahne und -mühlene verbii cho.
Die route isch zwor sehr beliebt und relativ touristisch, wa aber zum vorteil het, dasses es grosses agebot a einfache unterkünft🛏 uf de ganze strecki verteilt git.
De höhepunkt und höchsti punkt isch de hochgebirgspass „Thorong La“, wa so viel bedüted wie „Donnerpass“. Am tag vor de passüberquerig hemmer ufem highcamp🏕 uf 4800m bi um die -7°C übernachtet. Ime bescheidne rüümli mit zwei bett🛏 und bis uf de rost dureglegne matratze, hemmer d nacht verbrocht, gschloofe hemmer nöd viil. Bis do ane isch üs tipptopp gange und mir hend praktisch kei beschwerde gha i dere höchi. Da isch nöd selbstverständlich, denn es git en huufe lüüt, wo scho viil wiiter unne a symptom vo de höhechrankheit🤒 liided.
De wecker⏰ het am 4:00h glüüte. Verrusse isch no stockdunkel xi, iiszäpfe🥶 sind vom dach ghanget und de klari sternehimmel het gfunklet✨. Mir hend üs so warm iipackt wies nur gange isch und d stirnlampe🔦 ufem chopf montiert. Wiil im spötere nomi amigs en iisige wind🌬 ufzieht i dem gebiet, sött mer vorher de pass erreiche. Darum und au dass mir möglichst vor de ganze andere trekker dobe aachömed, simmer so beziite los. Eigentli isch die etappe gar nümme so wiit und steil xi. Denno hemmer ezz d höchi doch nochli z gspüre becho und mir sind langsamen schrittes über iis🧊 und schnee❄ uf de „Thorong La“ zue cho. Nocheme stündli hend die erste sunnestrahle🌄 hinter de berge füregügslet. Es isch wunderschön xi!🤩
Mir hends kum chönne erwarte – und endlich, i de ferni xehnd mir de höchsti punkt vom pass. Es isch nümme wiit und praktisch nur no gradus. Wow, gschafft!💪🏽 S gfühl, do obe uf 5416m z stoh, isch unglaublich und unbeschreiblich.🤗
Am gliiche tag no, simmer es grosses stuck -1700 höhemeter – wieder abwärts, weg vom schnee und eher ine kargi, wüesteähnlichi🏜 landschaft cho. Mir hend s dorf Muktinath erreicht und rast gmacht.
Obwohl mir s spektakulärste bereits erlebt hend, hets no wiiteri schöni und iidrücklichi erlebnis geh.
S bade🛁 ide heisse quelle in Tatopani isch e wohltat xi noch dene wandertäg. D ussicht zum sunneufgang🌄 vom „Poon Hill“ uf die umliegendi bergwelt isch eimolig. Und de weg dur die blüehende rhododendron-wälder🌸 het eim de früehlig gspüre loh.
Fun fact:
Wa mir nöd hend wölle usloh, isch de lokali McDonald’s – genannt „YacDonald’s“, im dörfli Kagbeni xi. S HappyMeal🍔🍟 us lokale, frische zuetate isch mega lecker. Wie bim richtige McDonald’s hends au do e einheitlichi arbetsbechleidig gha, jedoch in traditionellem stiil. S goldige M het natürli au nöd gfehlt und isch miteme yakchopf🐮 dargstellt worde.
Cooli idee, top umgsetzt und super fein!👌🏼
Demnächst startet d ilona en 3-wöchige yogakurs🧘🏼♀️ und de manuel wird als „strohwitwer“ d region in und um Pokhara erkunde.
Liäbi grüess manuel & ilona
