Hemmer schomol erwähnt wie riesig Indie🇮🇳 isch? Unglaublich! Es isch üs drum au es bizzeli schwer gfalle zum kalkuliere, wie lang mir wo chönd bliibe und wie langs duuret⏱ zum langi etappene zrugg zlegge. So im nochhinein chömmer sege, mir hetted guet no es paar täg länger am meer🌊 chönne bliibe. Denn ezz simmer scho wieder ziimli nördlich und hend no en knappe monet ziit bis üsi visa ablaufed.
Jo, ebe nochem strand🏖 nördlich vo Goa ischs denn langsam wieder ufwärts. Ein Tag simmer bewusst und gewollt nur chliini strössli überland gfahre. Da isch richtig schön xi.🏞 Immer mol wieder simmer a chliine, herzige dörfli verbi cho. S lebe do isch jedoch hart und vo täglich körperlich strenger arbet prägt. Vo jung bis alt und männer♂️ wie fraue♀️ packed aa; füürholz sammle, chuehmist💩 forme und tröchne loh zums als brennstoff chönne nutze, strossebau🚧 vo hand, feldarbet und viiles meh. Tier🐄🐓🐃 und mensch👨👩👧👧 lebed meistens zemme uf engstem ruum, i eifachste baute.
Wenn mer en huufe z schleppe het und kei gfährt zur verfüegig het, wirds ufem chopf treit. Mir stuuned😯 jedes mol wieder, wenn mir xehnd, wa für akrobate die inder sind. Sie chönd eifach alles ufem chopf träge; öb en grosse chorb gmües🥦🍅🥒, en wasserkanister🏺, en rucksack🎒, betonplatte und und und…
Bis ezz simmer in indie🇮🇳 vor allem am hinduismus begegnet, wa natürli au fast selbstverständlich isch, denn meh als 80% vo de inder sind hinduiste. Nichts ahnend simmer so uf üsere wiitere route es ersts mol mitem buddhismus in kontakt cho. D „Pandav leni caves“ isch es buddhistischs höhlechloster⛪ ime felse, wo meh als 20 höhlene umfassd. Mer weisses nöd so gnau, aber öppe um s 4./5. Jahrhundert isch das chloster in betrieb xi. De buddhismus☸ isch wie de hinduismus🕉, islam☪️, christetum✝️ und judetum✡, eini vode grosse weltreligione. De grössti unterschied zu dene anderne religione isch, dass im buddhismus kein gott/götter verehrt wird, sondern im zentrum stoth d entwicklig vom eigne geist👻. Es isch sehr spannend die verschiedene glaubensrichtige nöcher kenne z lerne und es regt zum nodenke und philosophiere aa.
Wiiter isches denn wieder uf grosse strosse🛣 und für churzi ziit hemmer en chliine iiblick is lebe vome indische lastwagefahrer🚛 übercho. Wie die ganze trucks🚛 sind au mir stunde uf de gliiche strosse gfahre und hend am obig bim iidunkle en schloofplatz binere raststätte gsuecht. Oft sind das eifach grossi flächene xi, mitere chliine „imbiss-bude“ und eme grosse wasserbecki zum sich wäsche. „Imbiss-bude“ tönt fast echli negativ und noch Fastfood. In würklichkeit bechunnt mer do jedoch e frisch zuebereiteti mohlziit, wo super lecker schmöckt😋. Bim wasserbecki schöpft jede chübelwiis wasser und wäscht sich demit🚿, bevors znacht git. Ebefalls vorem esse wird s fahrzüüg kontrolliert, putzt und e räucherstäbli wird ide fahrerkabine azündet.
Churz vor Delhi hemmer unterschlupf binere gruppe chletterer🧗🏾♂️ „Delhi climbs“ gfunde – e tolli, aktivi truppe. Rund zehn jungi manne hend sich do ide natur🏞, umgebe vo felse⛰, es paradis gschafft, wo sie wohned und ihrer liideschaft, em chlettere, nogönd. Vo do us hemmer mit eim vo dene jungs en spaziergang zume badesee gmacht. De see isch ide 80er/90er johr enstande, wiils do stei und schutt abtreit🏗 hend und nocher s grundwasser uneufe druckt het. Wow, es isch richtig herrlich xi und ewigs her, siit mir s letscht mol ime see gschwumme sind. (Mir hends nocher chli ide oberarme gspürt💪🏼)
Es isch eigentli nöd uf üsere liste gstande und mir hetteds au nie denkt, dass mir uf Neu-Delhi, id hauptstadt vo indie🇮🇳, innefahred, but we did it💪🏼. D megastadt Delhi het meh als 30 millione iiwohner und isch noch Tokio🇯🇵, s zweitgrösste ballungsgebiet weltwiit. Zum eine hemmer üs in Neu-Delhi es paar attraktione aaglueget. S India-Gate isches denkmol und erinneret ad soldate us Britisch-Indie, wo im erste weltchrieg fürs britische empire ihres lebe loh hend. All ihri näme sind do idem monument iigraviert.
De Lotus-Tempel, wo vo de form her ane lotusblueme erinneret, xeht im innere echli us wie e moderni chile. De tempel isch vode Bahaitum-Religion – ebefalls sehr interessanti glaubensasätz. De gründer rüeft dezue uf d erde als „nur ein Land und alle Menschen als seine Bürger“ z betrachte.
S Humayuns Tomb isch quasi de „Mini-Taj-Mahal“. Es isch de grabbau vome ehemolige herrscher usem 16. Johrhundert, wo sini frau für ihn baue loh het.
Zum andere hemmer üs au is getümmel und gschäftige triibe in Old-Delhi gstürzt. Do simmer ufem grösste asiatische gwürzmarkt🌶 xi.
Highlight: En bsundrige moment ide letschte täg isch uf eim vo üsne spaziergäng xi. Plötzli und ganz unerwartet isch üs en leopard🐆 über de weg ghuscht. De leopard🐆 isch genau so überrascht xi wie mir und grad wieder im dickicht verschwunde – mir sind ufem weg bliibe😉
Ezz simmer grad irgendwo zwüschet Haridwar und Rishikesh ide natur🏞, im Rajaji Nationalpark. Es isch bereits dunkel. De mond, d sterne und d glüehwürmli lüüchted✨. Usem „djungel“ ghört mer die verschiedenste grüsch vo unterschiedliche tier, ansonste ischs ruhig.
Liäbi grüess manuel & ilona
