Dank em app park4night finded mir immer wieder tolli spots. So hemmer z.B. au ime rebberg
binere winzer-familie dörfe mit üsem camper über nacht stoh – total abglege, mitere tolle ussicht über de rebberg, leckere & lokale spezialitäten und feine wii
. D froschschenggeli, wo au uf de menü charte gstande sind, hemmer jedoch usloh.
Vo de stadt Vlora simmer de küstestross entlang bis Saranda und ganz in Süde vo Albanie gfahre. D stränd
sind total schön und s wasser strahlt vo türkis bis dunkelblau
Es paar mol hemmer würkli grad direkt am meer chönne parkiere – nöcher isch nöd gange, wennd s auto
no im trochne hesch wölle stoh ha. A eim vo dene stränd isch üses abschleppseil in iisatz cho, zum zwei appezellerinne
usem sand z zieh.
Bevor mir die griechischi grenze überquert hend, hemmer im süde vo Albanie
nomol es bizzeli landiiwärts gchehrt. Es paar sehenswürdigkeite hemmer nämli no wölle go besichtige. Zum eine isch das s „Blaue Auge“ xi, die ergiebigsti quelle vo Albanie
und wie de name scho seit – wunderschön blau.
Gjirokaster, es herzigs städtli, wo denn grad uf üsem weg glege isch, hemmer denn natürli nöd usloh.
Für echli wellness feeling hemmer en halt bi de natürliche thermalquelle in Permet gmacht. Es sind öppe sechs verschiedeni beckene xi mit unterschiedlicher mineralischer zemmesetzig und s wasser het do zwüschet 22°C und 28°C
gha.
Noch zwei wuche Albanie glustets üs uf s nögste Land. Mir erreiched Griecheland
am 15.07.22 und hend jetzt e stund
vorsprung zu eu (ussert zu dir Ingrid in Australie
).
Gstartet hemmer do im Vikos-Aoos-Nationalpark und e schöni wanderig, immer am wasser no, gmacht. Vorgest simmer in Vradeto xi. Da ischs höchsti Dörfli idere Region. Natürli simmer die do bekannte „Vradeto-steps“ abe- und ufegstiege. De steili, steinerni weg isch bis is johr 1975 die einzig möglichkeit xi zum is dorf ufe respektive vo döt obe is tal abe z cho.
Mir sind erstuunt und positiv überrascht, dass mir trotz de jetzige hochsaison immer wieder stellplätz finded, wo nonig so überloffe sind.
D sproch respektive d schriftzeiche gend üs do es bizzeli es gfühl vome Analphabet – wennd uf de ortstafle nöd emol chasch enziffere i welem städtli grad bisch…
Üses Fazit vo Albanie:
Uf all fäll e reis wert! D mensche do sind sehr fründlich, offe und zuvorkommend. Gfühlt fahrt jede albaner en mercedes, au wenn die meiste strosse eher offroad feeling gend. Sehr schöni und abwechsligsriichi landschaft. Schad isch nur de viili abfall wo umeliit.
Fun Fact: s letscht mol e richtigi duschi hemmer vor 45 täg ide panorama badi in welsberg im südtirol gnosse
In Griecheland gits bestimmt au wieder viiles z erlebe! Mir freued üs und sind gspannt, wo üsi route wiiter goth.
Liäbi grüess manuel & ilona