Rumänie het üs sehr positiv überrascht und wahnsinnig guet gfalle. Guet, ehrlich gseit hemmer nebst em „grafdracula“ nöd viel vo dem land gwüsst. Und dass Rumänie viel meh z büüte het als vampir, isch üs schnell klar xi.
D hauptstadt Bukarest liit ide region namens Walachei und het üs mit ihrem charme fasziniert. E stadt mitere gschicht, wo nonig fertig gschriebe isch. De gigantischi Parlaments Palast, wo eis vo de schwerste gebäude weltwiit isch, imponiert uf all fäll, au wenn sini hintergründ und de bau eher strittig sind. I eim vo sine vielne sääl hanget en chronlüchter miteme gwicht vo guet 5 tonne – aso quasi öppe 1,5x üses Tatütata.Au eine vo de schönste Friedhöf Rumäniens, de Bellu-Friedhof und es ehemoligs Bordell hend mir miteme guide binere stadtfüehrig bsuechet.
In Rumänie gits einigi salzbergwerk. Mir hend üs d „Salina Slanic Prahova“ aglueget und sind überwältigt xi. Zerst isch mer 8 minute miteme shuttlebus in berg gfahre und denn inere riesige, 70 meter hoche halle und 208 meter under de erdoberflächi aacho. Sehr iidrücklich! D temperatur do unne isch s ganze johr über konstant bi rund 12°C und d luft het e wohltuendi, heilendi wirkig fürd atemweg.
Vo de region Transsilvanien hend wohrschiinli scho die meiste emol ghört, zumindest de name. Sie liit im zentrum vom land und het en huufe schöni schlösser und altstädtli wie zum biispiel Brasov. Durd gässli schlendere und ime restaurant lokali spezialitäte probiere, laded dezue ii.
S ehemolige Königsschloss Peles usem 19. Johrhundert hend mir vo z underst bis z oberst besichtigt und en grosse teil vo de total 160 zimmer xeh. Bsunders vo usse eriinerets eim anes märlischloss.
S schloss in Bran, s sogenannte „Schloss vom Graf Dracula“ hend mir üs nur vo usse aglueget. Mir hend leider kei Chnoblauch debi gha und üs drum nöd wiiter traut…
D natur isch wunderschön do und wandere wär bestimmt en traum. Trotzdem, dass es eher scho winter isch als no herbst, hend mir üs e wanderig vorgnoh. Über nacht sind mir jedoch uf knapp 2000 meter, vome schneesturm überrascht worde und en iisige wind het au de tag über bloset. D sunne het gschiint und es isch wie im winterwunderland xi. Mir hend e herrlichi schneewanderig gmacht, es isch aber die einzig wanderig bliibe.
Die zwei schönste und wohrschiinli au bekanntiste strosse in Rumänie sind d Transalpina und Transfagarasan – zwei panoramastreckene. Die müend mir es andersmol mache, denn es isch bereits z spot im johr und sie sind nümme für d durchfahrt göffnet. Mir hends zwor probiert, aber sind noch einige Kilometer tatsächlich ane barriere gfahre, so dass mir hend mösse chehre. En versuech wert isches denno xi.
En abstecher in süde vom land a die serbischi grenze hend mir unternoh bim bsuech im städtli Herkulesbad. E gegend, wos einigi natürlichi schwefelbäder git. D Sissi isch anno dazumal es paar mol do xi und het die bäder do, als die beste vom kontinent globet. Am bach entlang hets no immer mehreri heissi und frei zuegänglichi quelle. Mitere handvoll iiheimische, hauptsächlich im seniorealter, sind mir i dem guet 50°C warme Wasser ghogget und hends üs guet goh loh.
S wetter het echli kippet und es isch ezz oft regnerisch und chalt, so dass warm bädele genau s richtige isch. Da isch au mit en grund, warum mir bereits gest obig Ungarn erreicht hend. Ungarn isch bekannt für sini viele therme. Über 1500 quellene sölls do geh. So hend mir üs für die kommende täg e tour vo de eine therme zu de nögste therme vorgnoh.
Fun Fact:
Bi de stadt Cluj Napoca gits en wald, wo gseit wird, dass do immer mol wieder unerklärlichi, gruseligi ereignis passiered. Siit mir bi dem wald xi sind, spinnt d elektronik bi üs im Tatütata… wa für en zuefall!?
Liäbi grüess manuel & ilona